VIKEKE, 21 Abríl 2026 (TATOLI)—Xefe Suku Ossú de Cima, Celestino M. de Carvalho, informa daudaun ne’e konsultór husi empreza 3E ho empreza Caltech hahú mobiliza no instala torre wind mast iha área Larigu, Suku Ossú de Cima, Postu Ossú, Munisípiu Vikeke.
“Daudaun ne’e ita-nia empreza sira komesa servisu ba instalasaun iha área Larigutu ba futuru enerjia husi anin. Programa ne’e husi Eletricidade de Timor-Leste, Empreza Públika (EDTL, E.P.), liuhusi ekipa téknika distribuisaun Vikeke, akompaña diretamente 3E ho parseiru Caltech halo mobilizasaun no instalasaun torre wind mast iha área Larigutu–Ossú nune’e ami autoridade sira nafatin akompaña,” Celestino M. de Carvalho ba TATOLI iha Postu Vikeke Vila, Tersa ne’e.
Autoridade komunitária ne’e hatutan, programa enerjia husi anin ne’e komesa instalasaun, maibé parte autoridade no komunidade sira seiduk komprende ba futuru utilizasaun enerjia referida.
“Tanba ne’e, ami informa ba EDTL nasionál hodi halo sosializasaun ba ami-nia komunidade sira, atu ami bele komprende kona-ba benefísiu no dezvatanjen sira, maibé to’o agora seidauk mai halo sosializasaun ba ami. Ami kontinua husu ba EDTL bá-oin presiza kria sosializasaun ruma para ami komprende tanba buat ne’e foun,” nia hato’o.
Kona-ba Instalasaun torre wind mast ne’e ho objetivu atu sukat velosidade anin, nu’udár parte husi estudu preparatóriu ba dezenvolvimentu projetu enerjia eólika (wind power) iha área referda.
Estudu ne’e realiza ho apoiu finanseiru husi International Finance Corporation (IFC), atu garante disponibilidade dadus tékniku ne’ebé presiza no viavel hodi suporta planeamentu no implementasaun projetu iha futuru.
Antes ne’e, Prezidente Komisaun Ezekutiva EDTL, Paulo da Silva hamutuk ho Komisáriu Ezekutivu Serbisu Tékniku no Autoridade Postu Administrativu Ossú vizita sítiu ba futuru konstrusaun no instalasaun enerjia anin (wind power) iha Suku Ossú de Cima.
Projetu enerjia anin (wind power) iha Larigutu ho kapasidade estimativa 50 Megawatts (MW) nune’e instala aparellu hodi sukat velosidade anin iha Larigutu.
Jornalista: Vitorino Lopes da Costa
Editór: Xisto Freitas da Piedade
