DILI, 21 Abríl 2026 (TATOLI)—Governu Malázia liuhusi Empreza Probase Manufacturing Sdn husi Malázia halo aprezentasaun kona-ba sistema teknolojia projetu infraetrutura nian ba Primeiru-Ministru, Kay Rala Xanana Gusmão, ho objetivu atu ajuda normaliza kondisaun estrada rurál no munisipál iha Timor-Leste.
Ministru Obra Públika, Samuel Marçal, hateten Governu Malázia mai aprezenta sira-nia sistema infaretrutura, atu Timor-Leste bele implementa sistema ne’e liuliu ba iha parte estrada rurál no munisipál nian, tanba estrada nasionál kuaze konklui ona.
Tuir aprezentasaun sistema ne’e bele okupa tempu iha implementasaun nomós halo poupansa ba kustu materiál alkatraun to’o 40%.
“Tanba ne’e mak Primeiru-Ministru bolu ha’u atu akompaña reuniaun ne’e no tuir orientasaun husi PM katak empreza refere sei ba halo mós aprezentasaun iha MOP, MPIE no MF hodi prepara fundu,” Ministru Samuel informa ba jornlista sira iha Palásiu Governu, ohin.
Governante ne’e dehan, PM Xanana mós husu ba enjinária husi empreza refere atu halo estudu ba kondisaun rai iha Timor, atu bele implementa sistema ne’e iha Timor-Leste nia rai di’ak ka lae, tanba rai ne’e kondisaun mamar lahanesan ho nasaun seluk.
“Karik atu implementa, sira sei haree akordu ba oin ne’e saida mak sira bele halo. Ami sei indika fatin ida hodi hahú projetu pilotu dahuluk, se la’e, ita gasta de’it osan obra ne’e aat fila-fali,” nia hateten.
Aleinde ne’e, nia informa, tuir planu Governu sei ba vizita empreza ninia fatin iha Malázia hodi observa direta rekursu ne’ebé sira iha no obra saida mak sira implementa ona iha sira-nia rai
Embaixadór Malázia ba Timor-Leste ne’ebé reprezenta empreza Probase Manufacturing Sdn husi Malázia, Amarjit Sarjit Singh, hateten enkontru ohin loron ho Primeiru-Ministru hodi diskute kona-ba sira-nia empreza ne’ebé hakarak ajuda Timor-Leste ba imolementasaun projetu hadi’a estrada.
“Dalaruma ami bele ajuda Timor-Leste hodi finaliza problema ne’ebé mak sira hasoru hanesan kondisaun estrada ne’ebé sempre aat. Nune’e, ami halo negosiasaun ba sistema teknolojia ne’ebé ami iha hodi ajuda Governu Timor, ba preparasaun asume prezidénsia ASEAN iha tinan 2029,” nia hateten.
Nia hatutan, MOP mós aseita ona ho sira-nia inisiativa sira-ne’e atu prepara sira-nia enjeñária halo estudu efetivu ba kondisaun rai iha Timor-Leste molok atu implementa obra ida-ne’e.
Jornalista : Alexandra da Costa
Editór : Cancio Ximenes
