DILI, 20 Abríl 2026 (TATOLI)—Diretór Kompra Institutu Nasionál Farmásia no Produtu Médikamentu (INFPM), Sergio Belo, hateten iha trimestre dahuluk (Janeiru to’o Marsu) ne’e INFPM ezekuta Orsamentu Jerál Estadu (OJE) 2026 ne’e atinje ona 8,1%.
“Husi Janeiru to’o Marsu, Institutu Nasionál Farmásia no Produtu Médikamentu, ezekuta ona Orsamentu Jerál Estadu (OJE) 2026 atinje ona 8,1% ka millaun $2-resin,” Sergio Belo hateten ba jornalista sira iha nia kna’ar fatin, Kampung Alor, ohin.
Nia esplika, Orsamentu Jerál Estadu 2026 ne’ebé mak aloka Institutu Nasionál Farmásia no Produtu Médikamentu hamutuk $17.070.369,00 ne’ebé fahe ba kategoria saláriu vensimentu, bens servisu no transferénsia públika.
“Saláriu vensimentu ita ezekuta ona nomós bens servisu ne’e ita ezekuta ona. Agora trasnferénsia públika mak ita sei halo kompra medikamentu sira,” nia dehan.
Entretantu, tuir dadus portál trasnperénsia ne’ebé mak TATOLI asesu katak husi Janeiru to’o agora 21 abril 2026 husi orsamentu alokadu hamutuk $17,070,369.00 ezekusaun atinje ona 12.4% hanesan kompromisiu sira $12.440.803,28, obrigasaun sira $1.265.059,37, atuál $856.139,15 no saldo $2.508.367,20.
Jornalista : Felicidade Ximenes
Editór : Cancio Ximenes
