VIKEKE, 21 Abríl 2026 (TATOLI)—Prezidente Repúblika (PR), José Ramos-Horta, husu joven sira iha Munisipiu Vikeke kria dame hodi hametin estabilidade iha munisípiu ne’e.
“Ita presiza haree malu nu’udár timoroan no sarani. Labele haree malu bazeia tuir koor partidu idaidak nian. Ne’e ladún di’ak. Maski partidu sai importante tanba ita adopta sistema demokrártiku ne’ebé iha partidu, maibé ita tenke hametin unidade no dame,” Horta hateten asuntu ne’e bainhira vizita Munisípiu Vikeke, Tersa ne’e.
Xefe Estadu ne’e dehan durante ne’e partidu ida dalaruma mánan absoluta no dalaruma partidu balun mánan maibé tenke forma koligasaun hanesan partidu ida-rua no tolu hamutuk mak ba ukun ka kaer governasaun.
“Líder partidu polítiku sira ami sempre haree malu di’ak no lideransa sira tenke ko’alia ba malu hodi hametin dame iha ita-nia rai. Ita hotu-hotu presiza malu para hametin rai ida-ne’e, atu labele monu ba instabilidade,” nia hateten.
Jornalista: Vitorino Lopes da Costa
Editór: Xisto Freitas da Piedade
