DILI, 21 abríl 2026 (TATOLI) –Prezidente Repúblika (PR), José Ramos-Horta hato’o pozisaun ba disputa rai família Lurdes Menezes ne’ebé lokaliza iha área Praia dos Coqueiros aldeia Metin III Suku Bebonuk Postu Administrativu Dom Aleixo Munisípiu Dili.
“Maun-boot ita labele haree nia hanesan be ema ida nian, nia hanesan ema pai ida, pai ba nasaun ne’e, interven para buka ajuda solusaun, nia la’ós anti ida-ne’e, anti ne’ebá liliu afavór ba ki’ak sira ki’ik sira”, PR Horta hateten ba jornalista sira hafoin partisipa iha serimónia inagurasaun ba reabilitasaun edifísiu Banku Dezenvolvimentu Aziariku iha Faról, tersa ohin.
Horta dehan, Primeiru Ministru Xanana Gusmão nia prezensa ne’e atu buka solusaun ba problema ne’e.
“Ne’e duni, ha’u haree iha televizaun maun-boot ba buka halo mediasaun ka rezolve ne’e di’ak. Auditória be Governu barak barak ne’e la’ós atu halo persegisaun auditória ne’e so para haree problema saida tanba sa mak problema ne’e sempre akontese oinsá ita hadi’a institusaun sira ne’e hadia fallansu sira ne’e, ne’e Primeiru-Ministru nia opiniaun. Justisa la’ós ita bele hateten buat hothotu Justisa halo ne’e loos,” nia afirma.
Notísia relevante:Vizita Xanana ba família Lurdes no pozisaun Marí Alkatiri kona-ba rai Bebonuk
Xefe Estadu ne’e hatutan, ba kazu ida-ne’e ema balun sai vítima ba buat ne’ebé Juíz sira halo, tanba juíz sira mós ema, sira la’ós Nai Maromak, sira la’ós anju, sira mós ema ne’ebé hanesan ho ema baibain.
“Sira bele halo julgamentu ruma sala i ne’e la’ós iha Timor de’it iha Amérika que ha’u akompaña 100 pursentu daduur ema hira mak tama kadeia tinan tolu nolu, haat nolu liu tiha mak sira afinál ema ne’e inosente loos,” nia afirma
Tanba, Xefe Estadu kompara iha rekluzu sira tama prizaun no penaliza ona ho pena de morte tinan haat nolu hein ezekusaun ne’e akontese.
“Europa mak sistema justisa di’ak liu Austrália mós di’ak mas iha balun ne’e, Timor rai-ki’ik ne’e duni ha’u la hateten juíz sira Justisa 100 pursentu loos lae.Tanba ne’e mak ita kria Tribunál Supremu para la simu karik buat ruma iha Tribunál Dili, Tribunál Rekursu entaun ba Supremu atu fó dala ida tan korresaun justisa”, nia afirma.
Jornalista: Natalino Costa
Editór: Rafael Ximenes de A. Belo
