BOBONARU, 21 Abríl 2026 (TATOLI)-Estasaun kombustivel sira iha kapitál Maliana, munisípiu Bobonaru, fa’an gazolina no gazóleu ho folin tuir limite ne’ebé Governu estabelese.
Presu kombustivel iha sentru abastesimentu Graça Silva fa’an gazolina $1,47, gazóleu $1,60, JG fa’an gazolina $1,50 gazóleu $1,65, iha Aitula Fuels gazolina $1,46 no gazóleu $1,59, Abonkase gazolina $,150 no gazóleu $1,55 no estasaun Quybubun fa’an gazolina 1,49, no gazóel $1,52.
Enkuantu retallista sira fa’an gazolina iha dalan ninin ho folin husi $2 ba $2,50 ba kada aqua boot no jeriken husi $5 ba $5,50 to’o $6. Aleinde ne’e, gazóleu sa’e ba $4,50 no balun $5 kada jeriken.
Na’in ba empreza Graça Silva, Francisco Seixas da Silva, konfirma katak presu kombustivel atuál ne’ebé sira fa’an sei menus husi limite ne’ebé Governu deside.
“Presu tuir regulamentu ne’ebé Estadu hasai. Ami hetan karta husi ANP katak presu gazolina labele liu $1,50 no gazóleu labele liu $1,65. Daudaun kombustivel iha ami-nia fatin gazolina $1,47 no gazóleu $1,60”, nia informa ba jornalista sira iha Mau-Mali.
Fransisco dehan estasaun kombustivel iha Maliana deside presu sa’e no tun bazeia ba presu husi ETO no Pertamina International. “Karik sira hasa’e, ami hasa’e, karik tun ami mós hatún”, nia dehan.
Emprezáriu ne’e subliña katak retallista sira ne’ebé fa’an kombustivel iha dalan ninin hasa’e presu tanba sosa tutan iha estasaun kombustivel sira.
Letícia Lopes ne’ebé fa’an iha dalan ninin dehan hasa’e presu gazolina husi $2 ba $2,50 kada aqua tanba bainhira mantein ho presu anteriór la hetan lukru.
“Uluk ami hola bensin ne’e masa ida $49, agora sira ho karreta tanke ne’e mai fa’an masa boot ida $65. Entaun, ami mós tenke hasa’e ba $2,50”, nia dehan.
Tuir relatóriu hosi Autoridade Nasionál Petróleu (ANP) ba períodu loron 15-17 Abríl 2026, folin gazolina sira iha estasaun kombustivel varia husi $1,25 to’o $1,50 kada litru, enkuantu folin gazóleu nian varia husi $1,30 to’o $1,65 kada litru. Folin gazolina no gazoleu neʼebé daudaun baratu liu hetan de’it iha Queybubun Laco Combustiveis, munisípiu Bobonaru.
Governu Timor-Leste, liuhusi Konsellu Ministru, iha kuarta, 01 Abríl, aprova alokasaun orsamentu ho montante millaun $168,8 ba sosa kombustível litru millaun 80 hodi reforsa rezerva nasionál to’o tinan ne’e ramata.
Polítika ida-ne’e hanesan pasu estratéjiku ida atu antesipa interrupsaun potensiál sira ba fornesimentu enerjia globál sira, enkuantu mantein estabilidade folin nian no proteje kbiit sosa públiku nian iha inserteza jeopolítika internasionál nia leet.
Aleinde ne’e, Governu subliña katak folin kombustivel subsidiadu tenke mantein iha limite másimu ne’ebé estabelese ona hodi garante asesibilidade enerjia ba públiku.
Notísia relevante: Retallista balun hahú implementa folin kombustível tuir presu padraun Governu
Jornalista: Sergio da Cruz
Editora: Maria Auxiliadora
