BAUKAU, 22 Abríl 2026 (TATOLI)—Autoridade Munisipál Baukau (AMB), Kuarta ne’e, troka hanoin kona-ba prosesu preparasaun implementa podér lokál no desentralizasaun administrativa bainhira simu vizita deputada sira husi Parlamentu nasionál Austrália.
Prezidente Autoridade Munisipál (PAM) Baukau, Veneranda Eurico Lemos Martins konsidera prezensa membru Parlamentu Nasionál (PN) no senadora husi Austrália iha Baukau ho objetivu atu observa direta serbisu autoridade, motiva no troka hanoin kona-ba preparasaun feto atu simu podér lokál no desentralizasaun ne’ebé tuir planu sei hahú iha 2027.
“Vizita ida-ne’e fó motivasaun liuliu feto iha Baukau ba desentralizasaun tanba dezenvolvimentu la’ós mane de’it maibé mós feto,” Prezidente Autoridade Munisipál hateten iha ninia kna’ar fatin Vila Nova.
Eis deputada ne’e aprezenta kona-ba pontesialidade hanesan produtu lokál no rekursu, lala’ok serbisu ligadu ho administrasaun liuliu prosesu tomak preparasaun podér lokál inkluindu partisipasaun feto iha atendimentu públiku ne’ebé atuál iha Munisípiu Baukau.
AMB apresia mós ho apoia Governu Austrália nian iha Baukau liuliu parseiru dezenvolvimentu sira hanesan PARTISIPA no TOMAK ne’ebé durante ne’e kontribui ba autoridade no komunidade agrikultura iha Baukau.
Entretantu, membru Parlamentu Nasionál Austrália ne’ebé vizita AMB hamutuk na’in-haat kompostu husi Anne Urguhart, Shophie Scamps, Dai lie no Merry Doyle no senadora ida naran Kerrynne Liddie ne’ebé akompaña husi delegasaun embaixada Austrália iha Timor-Leste.
Jornalista: Natalino Belo
Editór: Xisto Freitas da Piedade
