DILI, 22 Abríl 2026 (TATOLI)—Vise-Ministru ba Asuntu Parlamentár, Adérito Hugo, hateten Governu liuhusi Primeiru-Ministru, Kay Rala Xanana Gusmão, deside no orienta Vise Primeiru-Ministru, Ministru Koordenadór Asuntu Sosiál, Mariano Assanami Sabino hodi lidere interinamente ba servisu Ministériu Ensinu Superior, Siénsia no Kultura (MESSK), hafoin maktoban Ministru José Honório fila hikas ba mundu seluk.
“Interinamente fó ba Vise Primeiru-Ministru Assanami mak lidera hodi haree no koordena servisu iha MESSK nian,” Vise-Ministru ne’e relata ba jornalista sira iha Palásiu Governu, ohin.
Governante ne’e mós hato’o nia sentimentu aprofunda ba saudozu Ministru José Honório da Costa Pereira Jerónimo, no família enlutada.
“Ha’u koñese maktoban ne’e nu’udar ema ne’ebé konsistente no kompromisu aas tebes ba dezenvolvimentu setór edukasaun. Ha’u koñese nia antes ona maibé hanesan membru Governu durante tinan rua resin,” nia dehan.
Nia hatutan durante tinan rua resin iha servisu ne’ebé avansa tebes hanesan estatutu politékniku Betanu no ninia kualidade hodi haree fali tan ba institutu politékniku seluk iha rejiaun, leste, oeste no sentrál.
Rezolusaun ne’e mós determina atu halo minutu silénsiu ida iha instituisaun públika sira no ensinu superiór hotu-hotu, iha data ne’ebé sei determina.
Sidadaun timoroan ho méritu rekoñesidu, destaka ninia dedikasaun públika tanba ninia kompromisu ba dezenvolvimentu sistema ensinu superiór, promosaun koñesimentu no valorizasaun kapitál umanu nasionál, tantu nu’udar membru Governu no molok ne’e iha Universidade Nacional Timor Lorosa’e.
Bainhira saudozu hala’o kna’ar Governu nian, iha ninia servisu sempre bazeia ba padraun ne’ebé aas kona-ba dedikasaun, kompeténsia téknika no espíritu servisu públiku, no mós kontribui ona ba konsolidasaun polítika públika iha área ensinu superiór, siénsia no inovasaun.
Durante ne’e Ministru nia vizaun estratéjika no kompromisu halo nia bele reforsa kualidade instituisaun ensinu superiór sira, promove kooperasaun akadémika internasionál, no mós habelar oportunidade formasaun avansada ba sidadaun timoroan sira.
Saudozu ne’e ninia mate nu’udar lakon ida ba Governu, ba komunidade akadémika no sientífika, no mós ba povu timoroan.
Jornalista : Alexandra da Costa
Editór : Cancio Ximenes
