DILI, 22 Abríl 2026 (TATOLI) – Atu prevene sirkulasaun osan falsu iha merkadu nasionál, Banku Sentrál Timor-Leste (BCTL, sigla portugés) kontinua hala’o kampaña literasia finanseira iha munisípiu sira hodi fó koñesimentu ba komunidade atu identifika osan loos no promove mós pagamentu dijitál.
“Banku Sentrál hamutuk ho banku komersiál sira iha tempu badak lansa QR Code, nune’e bele uza de’it telemóvel atu halo pagamentu. Ita tenke promove pagamentu dijitál. Bainhira ita uza ona QR Code atu halo pagamentu, ida-ne’e ita bele minimiza ka redús ona risku ba osan falsu sira ne’ebé agora sirkula ne’e”, Vise-Governadora BCTL, Sara Lobo Brites, hateten iha Faról.
Nia subliña katak bainhira promove pagamentu dijitál loja sira mós tenke iha kondisaun ba ida-ne’e atu kliente sira bele selu liuhusi telemóvel.
Tuir nia, ida-ne’e bele ajuda komunidade no negosiante sira halo tranzasaun ne’ebé seguru liu, lais, no la presiza ka’er osan fíziku ne’ebé iha risku ba osan falsu.
Ba pagamentu dijitál ne’e, BCTL sei implementa dahuluk iha Dili, iha loja boot sira, ba estudante sira, no ba ema ne’ebé iha koñesimentu molok alarga ba iha área remota sira. Enkuantu, iha área remota ne’e sei depende nafatin ba osan fíziku, maibé banku kontinua halo sosializasaun kona-ba osan loos (genuine) ne’e.
BCTL husu nafatin ba komunidade, liuliu negósiu ki’ik sira ne’ebé fa’an sasán mak hetan osan valór $100 husu labele naran foti ka simu de’it, maibé tenke konfirma didi’ak tanba osan ho montante ne’e baibain ema foti bainhira halo viajen bá rai-li’ur no uza iha loja boot sira. “Ita alerta ba negósiu ki’ik sira bainhira ema lori $100 halo tranzasaun di’ak liu haree lai”.
Relasiona ho sirkulasaun osan falsu iha rai-laran hahú husi sentavu 50, 200, $5, $20 to’o $100, BCTL kontinua halo sosializasaun ba komunidade, liuliu iha área rurál sira oinsá koñese di’ak osan sira ne’e.
Sosializasaun ne’ebé BCTL halo dezde akontese sirkulasaun moeda falsa sentavu 200 ne’e ba iha loja sira iha Dili no kontinua ba munisípiu hotu.
Notisía relevante: BCTL sei lansa kódigu QR nasionál ba pagamentu dijitál iha tinan 2026
Jornalista: Arminda Fonseca
Editora: Maria Auxiliadora
