BAUKAU, 22 Abríl 2026 (TATOLI)—Konflitu entre joven rezulta ema na’in-rua hetan kanek iha Suku Afaloikai, Postu Administrativu Baguia, Munisípiu Baukau.
Kazu referidu akontese iha Bairru Nuniria, Aldeia Oqilari, Suku Afaloikai, iha Kuarta (22/04/2026) purvolta madrugada tuku 04:15 Otl iha-ne’ebé suspeitu ho inisiál AdS ho kondisaun lanu hafoin ramata konsume alkol (tua-sabu) utiliza arma branka (katana) taa mane na’in-rua ho inisiál AdS no EM idade menus husi tinan 25 hetan kanek.
“Sira hela no konsume tua-sabu hamutuk hotu mak kazu ne’e akontese. Na’in-rua mak kanek, entretantu suspeitu seidauk entrega aan ba polísia,” Xefe Suku Afaloikai, Germano Baptista informa liuhusi telefónema, Kuarta ne’e.
Germano relata vítima M hetan kanek iha liman parte loos no vítima AdC hetan kanek iha ain parte loos no autoridade suku deteta ona suspeitu AdS nia paradeiru inklui asegura ona hodi hein transporta ba eskuadra Postu Baguia antes halo investigasaun.
Aleinde ne’e, hafoin akontesimentu referidu, vítima na’in-rua evakuadu kedas ba uma hodi halo tratamentu no parte seguransa liuhusi Polísia Nasionál Timor-Leste (PNTL) Eskuadra Postu Baguia to’o kedas lokál akontesimentu hodi halo atuasaun no buka tuir suspeitu.
“Vítima na’in-rua ne’e grave entaun ohin transporta ona ba Baukau,” Germano haktuir.
Entretantu, Autoridade Suku Afaloikai rekomenda ba parte kompetente atu futuru hamosu regra ne’ebé rigorozu hodi evita joven halibur hamutuk no bandu konsume alkol iha fatin públiku.
Jornalista: Natalino Belo
Editór: Xisto Freitas da Piedade
