DILI, 22 abríl 2026 (TATOLI) – Ministru interiór, Francisco da Costa Guterres informa katak Primeiru Ministru Kay Rala Xanana Gusmao, liuhusi reuniaun Konsellu Ministru, fó orientasaun ba ministériu haat hanesan Ministériu Defeza, Ministériu Interiór, Ministériu Transporte no komunikasaun no Ministériu Agrikultura no Peskas, hodi reforsa servisu patrullamentu tasi Timor prevene peska ilegál.
“Ami tuur hamutuk dala rua tiha ona, mas Primeiru Ministru husu atu kontinua nafatin iha koordenasaun, para depois ami prepara condições ne’ebé mak iha, atu hahú fila fali patrullamentu iha kosta súl. Parte ne’e mós ita buka tuir nafatin mas ita tenke fokus uluk ba kosta sul uituan,” Ministru Francisco ba jornalista sira iha Palásiu Governu kuarta ne’e.
Notísia relevante:Ró peska ilegál iha tasi Timor kada loron aumenta, to’o horisehik iha ró 10
Ministru Interiór ne’e kompromete katak sira sei buka solusaun, haree mós ró balun ne’ebé kondisaun di’ak hodi bele halo patrullamentu.
“Prontu ita buka tok ró seidauk iha, mas kondisaun ró balun ne’ebé mak iha kondisaun di’ak hela. Foin lalais ne’e UPM, ho ró oan ida konsege kaptura ró boot ida,” nia rekorda.
Governante ne’e mós atualiza katak presiza iha ró ho kondisaun ne’ebé mak másimu nune’e sira bele halo servisu ida ne’e.
“Mas imi haree ita-nia polísia kaer ne’e ema barak. Sim uluk kedas mas ita-nia polísia ne’e ho kondisoes ne’ebe mak iha sira konsege rezolve; ita mantein dadaun”, nia dehan.
Notísia relevante:Xanana husu autoridade asegura Tasi Timor prevene peska ilegál
Jornalista: Natalino Costa
Editór: Rafael Ximenes de A. Belo
