BAUKAU, 22 Abríl 2026 (TATOLI)—Ekipa Sekretaria Estadu Asuntu Toponímia Organizasaun Urbana (SEATOU), Kuarta ne’e, realiza sosializasaun primeira alterasaun Dekretu-Lei numéru 03/2024, kona-ba Ijiene no Orden Públika ba líder komunitáriu sira iha Munisípiu Baukau.
Diretóra Jerál Toponímia Organizasaun Urbana, Maria Odete Barros Florindo, esplika prezensa husi ekipa ne’e bazeia ba pedidu husi Autoridade Munisipál Baukau ho objetivu sensibiliza baze legál ba líder komunitáriu sira ligadu ho ordenamentu urbanu iha Munisípiu Baukau.
“Ami-nia prezensa iha-ne’e atu hakle’an liután dekretu-lei ne’e. Ami hatene katak sira hahú implementa mezmu seidauk másimu liuliu kontrola animál ne’ebé husik arbiru no fa’an sasán iha trotoár,” Maria Barros hateten iha Salaun Apuramentu Administrasaun Munisipál Vila Nova.
Maria Barros relata SEATOU hala’o serbisu bazeia ba baze legál lima hanesan Dekretu-Lei numéru 29/2016 kona-ba Toponímia Organizasaun Urbana, Dekretu-Lei númeru 02/2017 kona-ba rezíliu sólidu urbanu, Dekretu-Lei númeru 51/2023 kona-ba publisidade, Dekretu-Lei númeru 03/2026 kona-ba estasionamentu no Dekretu-Lei numéru 03/2024, kona-ba ijiene no orden públika.
Aleinde ne’e, tuir planu Munisípiu Baukau tempu badak sei implementa Dekretu-Lei númeru 03/2026 kona-ba estasionamentu ne’ebé atuál sei iha faze levantamentu dadus kona-ba tarifa parajen transporte iha fatin públiku no turizmu nune’e futuru bele kontribui reseita ba autoridade.
“Mudansa ne’e neineik maibé atu simu podér lokál ne’e presiza duni ita hotu nia hamutuk atu hadi’a ho hanoin buat hotu sei di’ak iha futuru,” Maria Barros akresenta.
Entretantu, atividade sosializasaun Dekretu-Lei numéru 03/2024 ne’e partisipa husi xefe suku, dirijente serbisu munisipál inklui administradór postu administrativu sira iha Munisípiu Baukau.
Jornalista: Natalino Belo
Editór: Xisto Freitas da Piedade
