DILI, 23 Abríl 2026 (TATOLI)—Arsebispu Metropolitanu Dili, Don Virgílio Kardeál do Carmo da Silva, SDB, solisita sarani sira atu partisipa iha peregrinasaun Jubileu São Francisco de Assis hodi hametin fiar no promove dame iha Timor-Leste.
“Iha tinan ida-ne’e ita haksolok tanba ita hetan tan oportunidade ida, tinan kotuk selebra Jubileu ordináriu ida. Tinan ida-ne’e ita hetan tan biban ksolok ida iha uma-kreda liuliu iha ita-nia rai ho prezensa ramu Família Fransiskanu ne’ebé boot iha Timor-Leste. Ita bele loke tan odamatan boot ba grasa Maromak nian ba ita-nia rai. Nune’e, ksolok boot ida ba ita hotu, unidade ida ba igreja hotu no ba sarani sira tomak, tan ne’e ba Prezidente FRATILES nia kna’ar ne’e atu serbí duni ne’ebé ba komisaun organizadora mós oportundiade furak ida atu hada’et,” Kardeál hato’o iha nia diskursu, iha Igreja Katedrál, Dili, Kuarta ne’e.
Amu Bispu hatutan liuhusi peregrinasaun ne’e hada’e karizma rikusoin espirituál kreda nian atu nune’e joven sira no Família Franciscana nia ambiente.
Entretantu, Prezidente Família Franciscana Timor-Leste (FRATILES), Frei Mateus Soares Gomes, OFMCap, dehan durante tinan jubileu ida-ne’e atividade ne’ebé FRATILES halo ne’e la’o ona, ohin loron abertura ona ho misa, signifika katak bá-oin sarani sira-ne’ebé mak iha vontade atu halo peregrinasaun hodi manán induljénsia plenária ba joven no ba sarani sira hotu iha Timor-Leste.
“Ami husu atu ita bele partisipa iha atividade sira-ne’ebé ami hala’o liuliu ba iha peregrinasaun sira-ne’e. Kada grupu sei halo ba fatin ne’ebé ohin ha’u fó-sai ona iha diskursu katak iha Dioseze Baukau sarani sira-ne’ebé iha-ne’ebá atu halo peregrinasaun hodi hetan induljénsia plenária. Sira bele bá vizita Parókia Nossa Senhora do Rosário Laleia (Manatutu), iha-ne’ebá ami-nia Komunidade Franciscano iha-ne’ebá. Sira bele bá halo iha-ne’ebá hodi hetan induljénsia plenária, no iha Dioseze Dili ne’e mak iha Parokia de São Francisco de Assis Fatuberlihu (Manufahi), Parokia São João Paulo II iha Pássabe (Oekusi), nune’e mós Konventu Santu António Fomentu II (Dili). Parte Dioseze Maliana nian mak sarani sira bele halo ona peregrinasaun maka hanesan Mosteiro das Irmãs Clarissas Tunubibi (Bobonaru), Konventu São Francisco de Assis iha Tibar (Likisá), nune’e mós koventu sira seluk ne’ebé mak Irmã Franciscana sira horik ba,” Frei esplika.
Família FRATILES hateten prepara orasaun sira, sira bá iha-ne’ebá, dahuluk sira halo peregrinasaun, halo orasaun no konfesa, hotu tiha ida-ne’e sira bele hetan induljénsia plenária.
Bainhira Santu Padre (Papa Leão XIV) fó sai katak tinan ida-ne’e tinan Jubileu ba São Francisco de Assis ne’e la’ós ba Família Franciscana de’it, maibé ba sarani tomak iha mundu, sira hotu ne’e tama hotu iha peregrinasaun ida-ne’e.
“São Francisco de Assis ne’e santu ida-ne’ebá mak kria dame iha mundu. Dame la’ós dame ba ema de’it, dame kriasaun tomak, dame ba buat hotu ne’ebé Maromak kria iha mundu. Ne’e duni, ba foin-sa’e sira iha Timor-Leste ne’e oportunidade di’ak ba ita, tinan grasa nian ba ita, duké ita lakon ita-nia tempu ba halo problema, di’akliu fó ita-nia tempu no halo peregrinasaun sira atu nune’e bele hetan perdaun ba sala sira nune’e ita nia mundu bele hetan dame,” Frei subliña.
Jornalista: Osória Marques
Editór: Xisto Freitas da Piedade
