DILI, 23 Abríl 2026 (TATOLI) – Komisaun F ne’ebé Trata Asuntu Saúde, Igualdade Jéneru no Inkluzaun Sosiál, halo audiénsia públika ho Sekretaria Estadu Formasaun Profisionál no Empregu (SEFOPE) no Sekretaria Estadu Igualdade (SEI) hodi rona sira-nia hanoin kona-ba ezbosu Lei Rejime Jurídiku ba Traballadór Doméstiku.
Prezidente Komisaun F, Maria Gorumali Barreto, hateten audiénsia ne’e ho objetivu mak atu rona opiniaun husi SEFOPE ne’ebé nia papél haree ba asuntu traballadór sira-nian, liga ba artigu balun ko’alia kona-ba traballadór doméstiku, nune’e presiza lejizlasaun espesífika hodi regula.
Tanba ne’e vuneravel tebes no Timor-Leste presiza iha lei ne’e hodi fó protesaun no promosaun ba iha traballu doméstiku sira.
Tuir nia, traballu doméstiku ne’e maioria feto, ne’ebé iha país ne’e rasik barak hala’o hela, maibé tratamentu mak seidauk igual ho traballadór sira seluk, hanesan diskriminasaun, violénsia ne’ebé mosu ba traballadór doméstiku. “Situasaun sira ne’e hotu, mak Komisaun tau prioridade atu elabora projetu lei. Komisaun hakarak trata lejizlasaun ne’e no prevene labarik menoridade sai traballadór doméstiku”, nia hateten iha Parlamentu Nasionál, ohin.
Iha fatin hanesan, Sekretáriu Estadu Formasaun Profisionál no Empregu (SEFOPE) Interinu no atuál Sekretáriu Estadu Dezenvolvimentu Lokál, Mateus dos Santos Talo, konsidera lejizlasaun ne’e iha nesesidade atu fó kondisaun digna ba sidadaun, liuliu traballadór sira.
Sekretária Estadu Igualdade, Elvina de Sousa, mós apresia inisiativa Komisaun nian hodi inísia projetu lei, tanba asuntu ne’e sai preokupasaun públika oinsá atu fó protesaun, kondisaun serbisu no saláriu dignu.
Parte SEI apoia inisiativa ne’e, tanba durante ne’e halo advokasia ba lejizlasaun sira ne’ebé ligada ba promosaun igualdade, inkluzaun, atu empodera feto iha setór hotu.
“Lei ne’e atu kria kondisaun digna, regulariza sira-nia devér, fó direitu hanesan férias, subsídiu anuál, seguransa sosiál ho seluk tan. Tanba ne’e, hatuur ona iha mandatu konstituisionál atu traballadór hothotu iha direitu ne’ebé aseguradu”, nia relasa.
Jornalista: Nelson de Sousa
Editora: Maria Auxiliadora
