DILI, 23 Abríl 2026 (TATOLI) – Membru husi Parlamentu Foinsa’e Nian (PFN) hamutuk 121 halo estudu iha zona fronteirisa, iha Rejiaun Administrativa Espesiál Oekusi Ambenu (RAEOA), Kovalima no Bobonaru. Vizita ne’e hahú husi loron 22 to’o 27 Abríl.
Objetivu husi estudu ne’e mak fó espasu ba membru sira bele identifika problema sosiál sira ne’ebé akontese, liuliu iha zona fronteira nian ne’ebé bazeia ba temátiku hanesan “Joven ho Edukasaun, Joven iha Moris Saudavel, Joven Empregu ho Empregabilidade, Joven ho Krime no Violénsia no Joven iha Partisipasaun Síviku no Grupu Alvu na’in-sia iha Polítika Nasionál Juventude”.
Rezultadu husi vizita ne’e mak sei sai hanesan dadus hodi membru PFN sira sei diskute iha plenária daruak iha fulan-Jullu no husi ne’e mak sei hamosu rezolusaun ne’ebé ikus sei sai hanesan rekomendasaun ba liña ministeriál sira ne’ebé iha ligasaun ba isu ne’ebé membru sira hetan iha terrenu.
Prezidente Alumni Parlamentu Foinsa’e Timor-Leste (APFTL), Benvinda Gusmão Alves, hateten katak atividade ida-ne’e realiza iha ba dalimak, ne’ebé estudante sira konsentra iha kada postu no munisípiu sira.
Iha atividade ne’e, membru sira sei vizita entidade sira ne’ebé iha linã fronteirisa, hanesan Unidade Polísia Fronteira (UPF), servisu imigrasaun, sentru saúde, servisu edukasaun munisipál no komunidade, atu hatene progresu serbisu no obstákulu sira ne’ebé hasoru lorloron nian.
“Sira sei halo entrevista ho komunidade, observa diretamente no ikus mai sei akumula hotu dadus hodi halo validasaun liuhusi workshop”, nia dehan.
Tuir dadus, membru Parlamentu Foinsa’e iha totál ema na’in-142, kompostu husi feto 71 no mane 71, inklui ema ho difisiénsia na’in rua (feto ida no mane ida). Enkuantu iha atividade vizita ida-ne’e, partisipante iha de’it ema na’in-121 tanba balun estudante, balun estuda iha rai-li’ur no seluk okupadu ho atividade balun.
Programa ne’e implementa husi Governu, liuhusi Ministériu Juventude, Desportu, Arte no Kultura (MJDAK), tuir Polítika Nasional Juventude ne’ebé lansa iha 2016, atu dezenvolve kapasidade joven sira ho idade entre 12-17 iha área lideransa, partisipasaun sívika no dezenvolvimentu sosioekonómiku.
Iha tinan ne’e, MJDAK aloka rihun $100 ba APFTL hodi implementa programa prioritáriu sira.
Jornalista: Nelson de Sousa
Editora: Maria Auxiliadora
