DILI, 23 Abríl 2026 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, esklarese katak nia akompañamentu hamutuk ho órgaun komunikasaun sosiál estatál no privadu, ba atividade Primeiru-Ministru (PM), Xanana Gusmão, hola parte husi esforsu atu disemina informasaun kona-ba asaun governativa ho forma ne’ebé besik no asesivel ba populasaun.
Nia klarifika ida-ne’e hodi responde ba preokupasaun husi deputadu opozisaun husi Bankada Frente Revolusionária Timor-Leste Independente (FRETILIN), Antonino Doutel Sarmento, ne’ebé foin lalais levanta iha reuniaun plenária Parlamentu Nasionál kona-ba prezensa kontinuada SEKOMS iha atividade PM nian.
Expedito esplika katak, tuir órganika SEKOMS, serbisu prinsipál ida mak diseminasaun informasaun governu nian, ne’ebé signifika katak atividade Governu nian tenke hetan kobertura.
Tanba ne’e, SEKOMS serbisu hamutuk ho mídia konvensionál no plataforma digitál sira hodi garante kobertura ba atividade Xefe Governu nian.
“Akompaña primeiru-ministru tanba ha’u-nia serbisu. Bainhira primeiru-ministru hamutuk ho mídia, ha’u iha ne’ebá. Kuandu primeiru-ministru la’o mesak, ha’u laiha. Tanba ne’e, bá iha ne’ebé, mídia sempre tuir. Ha’u kuandu bá ne’ebé, primeiru-ministru iha, mídia sempre iha, no primeiru-ministru kuandu hasoru malu ho mídia, ha’u tenke iha ne’ebá”, nia hateten iha Palásiu Prezidensiál, Bairu Pite, ohin.
Nia mós klarifika katak SEKOMS prevee, iha tinan ne’e, rihun $30 la’ós $50, atu apoia kobertura atividade PM iha rai-laran no rai-li’ur. “Osan ne’e barak liu uza ba jornalista sira, presiza sosa hahán ruma. Ha’u tuir ho protokolu de’it”, dehan.
Jornalista: Nelson de Sousa
Editora: Maria Auxiliadora
