DILI, 22 Abríl 2026 (TATOLI)—Ministériu Interiór (MI) prioriza infraestrutura polisiál iha tinan 2026 to’o 2027 nune’e bele hadi’a oferese servisu di’ak ba povu.
Ministru Interiór, Francisco da Costa Guterres, hateten, projetu edifísiu Kuartél Jerál Polísia Nasionál Timor-Leste (PNTL) ne’ebé foin daudaun halo ona lansamentu, empreza xineza ne’ebé Governu kontrata daudaun kontinua halo no sei finaliza tuir loron ne’ebé determinadu iha tinan 2027.
“Kona-ba projetu Komandu Minisipál ne’e mós Ministériu Interiór haree ona, maibé tinan ne’e ita foku ba projetu konstrusaun edifísiu Eskudra sira no ba projetu ida-ne’e aprovadu hotu, agora la’o hotu ona iha fatin barak, espera katak tinan ida-ne’e hotu ita kompleta ein termude kazerna ho Eskudra iha kada postu,” Ministru Francisco hato’o ba Jornalista sira hafoin partisipa iha reuniaun Konsellu Ministru, iha Palásiu Governu, Kuarta ne’e.
Notísia relevante : Komandu PNTL hamutuk MI diskute rai ba konstrusaun infraestrutura polisiál
Governu daudaun ne’e iha planu atu harii Kuartél Munisipál iha tinan 2026 no 2027 inklui kompleta mós bairru (kazerna) ba Polísia sira.
Nia dehan, tinan ida-ne’e tenke halo hotu ona, daudaun hahú harii Eskudra iha Hatulia, Kelikai, Kristu Rei no Na’in-Feto inklui rua seluk tan.
“Eskudra Kritu Rei no Na’in Feton tinan tenke halo hotu ona fulan ida ka rua hahú ona.Ami-nia tékniku sira hahú halo servisu hodi apoia servisu sira ne’e, maibé espra tinan ne’e obras sira ne’e bele la’o nune’e tinan ne’e bele la’o hodi ita kompleta ba 2027”, nia dehan.
Jornalista : Natalino Costa
Editór : Rafael Ximenes de A. Belo
