DILI, 23 Abríl 2026 (TATOLI) – Primeiru-Ministru, Xanana Gusmão, relata serbisu Governu nian, liuliu desizaun sira ne’ebé aprova iha reuniaun Konsellu Ministru horisehik ba Prezidente Repúblika, José Ramos-Horta.
Tuir Xanana, Konsellu-Ministru aprova proposta alterasaun dahuluk Lei númeru 13/2011, loron 28 Setembru, kona-ba Rejime Dívida Públika, ne’ebé sei haruka ba Parlamentu Nasionál, no relata mós katak aprova ona Dekretu-Lei kona-ba Taxa Rodoviária, ne’ebé antes ne’e haruka tiha ona, maibé Prezidente Repúblika kestiona buat balun hodi hadi’a fali.
Iha biban ne’e mós informa kona-ba falesimentu Ministru Ensinu Superiór, Siénsia no Kultura, José Honório da Costa Jerónimo, tanba ataka kardiáku.
“Ha’u mós informa kona-ba negosiasaun Greater Sunrise nian ba Prezidente Repúblika. Ba prosesu hotu daudaun la’o ne’e husu boot to’o Jullu buat sira ne’ebé sei falta ne’e asina hotu tiha, nune’e bele dudu ona sasán”, nia dehan.
Lembra katak, iha loron 14 Abríl, Governu Timor-Leste no Austrália finaliza ona dokumentu Kódigu Mineiru Petróleu (PMC, sigla inglés) ba dezenvolvimentu Greater Sunrise. Finalizasaun dokumentu referidu liuhusi ronda negosiasaun ne’ebé realiza iha fulan-Marsu tinan ne’e.
Iha negoasiaun ne’e, iha dokumentu tolu importante ne’ebé parte rua diskute mak Kódigu Mineiru ba Petróleu (PMC), Kontratu Fahe Produsaun no Rejime Fiskál, maibé ekipa foin finaliza uluk mak PCM.
Dokumentu tolu ne’e importante tenke finaliza iha tinan ne’e. Bainhira dokumentu sira ne’e finaliza maka sei hakat ba desizaun ba planu úniku konseitu dezenvolvimentu kampu Greater Sunrise.
Jornalista: Arminda Fonseca
Editora: Maria Auxiliadora
