TATOLI no China Media Group reforsa kooperasaun iha setór media
DILI, 24 Abril 2026 (TATOLI) – Agência Noticiosa TATOLI, IP, kontinua reforsa tan kooperasaun ho media internasional hanesan China Media Group (CMG) ho objetivu troka kontéudu inklui hasa’e kapasidade iha setór media.
Hasoru malu entre Prezidente Konsellu Diretivu TATOLI, Noémio Falcão, ho ekipa CMG, ne’e hala’o iha Edifisiu TATOLI, Farol, Dili, Sesta ne’e.
Prezidente Konsellu Diretivu TATOLI, Noémio Falcão, hatete ekipa CMG nia vizita mai TATOLI hanesan kontinuidade husi servisu hamutuk ne’ebé mak parte rua halo ona antes.
Kolaborasaun entre TATOLI no CMG antes ne’e inklui ona produsaun dokumentáriu no kobertura hamutuk, hanesan atividade filmagem iha Hospitál Nasionál Guido Valadares (HNGV), liuliu kona-ba servisu doutór sira husi Xina ne’ebé servisu iha Timor-Leste.
“Kooperasaun ida ne’e la’ós foun, maibé kontinuidade husi servisu ne’ebé mak lao hela. Ekipa husi CMG servisu hamutuk ho TATOLI halo dokumentáriu kona-ba servisu doutór sira husi Xina iha HNGV no fatin seluk,” hatete Prezidente Noémio Falcão.
Nia hatutan tan katak rezultadu husi servisu hamutuk ne’e sei publika atu fó informasaun ba públiku kona-ba kontribuisaun doutór internasional, liuliu husi Xina, iha setor saúde Timor-Leste.
Iha enkontru ne’e, parte rua mós konkorda atu kontinua reforsa kooperasaun iha futuru, inklui liuhosi programa dezenvolvimentu kapasidade no rekursu umanu.
“Sira (CMG) mós konvida atu TATOLI nia ema atu ba halo estudu komparativu iha Xina no nune’e mós troka konteudu entre parte rua,” dehan nia.
Liuhosi troka kontéudu ne’e, material husi CMG bele publika iha kanal TATOLI, no kontéudu husi TATOLI mós bele distribui liuhosi rede media ne’ebé mak afiliadu ho CMG. Kontéudu sira ne’e inklui área turizmu, dezenvolvimentu, ekonomia, kultura no problema sosiál.
Prezidente TATOLI ne’e mós hatete katak inisiativa ida ne’e sei ajuda hasa’e visibilidade Timor-Leste iha nivel internasional no hametin papel TATOLI hanesan media ne’ebé aktivu iha kooperasaun global.
China Media Group (CMG) servisu hamutuk ho TATOLI hahu kedas iha tinan 2024 no hanesan grupu mídia estatál Xinés ida ne’ebé harii iha 2018 iha Pekin. CMG maka fuzaun ida hosi China Central Television (CCTV), China National Radio (CNR), no China Radio International (CRI), inklui opera China Global Television Network (CGTN).
CMG transmite iha lian 40 liu no hala’o papél ida hodi hametin influénsia mídia Xina nian iha nivel mundiál no apoia kooperasaun internasionál.
Jornalista : Cidalia Fátima
Editora : Armandina Moniz
