UE no CCI-TL aborda kooperasaun hodi apoia setór privadu nasionál
DILI, 24 Abríl 2026 (TATOLI)-Embaixadór Uniaun Europeia (UE) iha Timor-Leste, Thorsten Bargfrede, hasoru malu ho Prezidente Kámara Komérsiu no Indústria Timor-Leste (CCI-TL, sigla portugés), Jorge Serrano, hodi diskute kona-ba kooperasaun, liuliu apoia setór privadu nasionál hodi kompete ba iha merkadu ASEAN.
Prezidente CCI-TL, Jorge Serrano, hateten enkontru ida-ne’e ko’alia kona-ba futuru parseria CCI-TL ho Uniaun Europeia, liuliu serbisu emprezariál Timor-Leste.
Tuir nia, Uniaun Europeia observa katak Timor-Leste tama ona ASEAN hanesan oportunidade boot ida, entaun kapasita setór privadu nasionál bele partisipa ativa iha Ázia, ne’ebé CCI-TL hola parte ba ASEAN Business Advisory Council (ASEAN-BAC).
“Enkontru ohin ne’e oinsá apoia finanseiru, tékniku no kapasitasaun ba emprezáriu sira, liuliu ita-nia Estadu deklara ona katak 2029 Timor-Leste sai uma-na’in ba ASEAN. Automatikamente CCI-TL mós sei ASEAN-BAC, entaun preokupasaun sira ne’e hotu ami husu embaixadór atu fó apoiu tékniku ruma hodi halo preparasaun di’ak iha ita-nia ASEAN-BAC iha 2029”, Jorge Serrano hateten iha edifísiu CCI-TL, Dili.
Iha enkontru ne’e, embaixadór ho vontade tomak hakarak apoia CCI-TL, liuliu setór privadu nasionál atu dezenvolve hodi tama iha ASEAN-BAC ne’e.
Kona-ba preparasaun CCI-TL bainhira Timor-Leste lidera Prezidente ASEAN, nia hateten kontinua halo preparativu sira, maibé ida-ne’e emprezáriu idaidak tenke prepara, tanba ne’e la’ós ba enkontru formál sira, maibé mós produtu sira tau iha merkadu.
Embaixadór UE, Thorsten Bargfrede, hateten Uniaun Europeia hanesan parseiru dezenvolvimentu ba Timor-Leste durante tempu naruk, nune’e hasoru malu ho CCI-TL atu haree kona-ba parseria iha asuntu dezenvolvimentu ekonómiku rai-laran nian.
Nia subliña katak área kooperasaun ne’e importante tebes, tanba hatene katak Uniaun Europeia iha konsumidór entre millaun 500 no ASEAN nian iha millaun 600, ida-ne’e hanesan oportunidade ida ba Timor-Leste atu halo kooperasaun.
“Diskusaun ohin ita bele ajuda Mikro, Pekena, no Média Empreza sira, nomós empreza foinsa’e, feto sira liuliu oinsá sira bele asesu ba finansiamentu”, nia dehan.
Uniaun Europeia hala’o hela ninia atividade sira bolu agrofloresta ninian ne’ebé halo serbisu hamutuk ho CCI-TL ne’ebé implementa ba programa ida-ne’e husi Asosiasaun Emprezariál Muller Timor-Leste(AEMTL).
Nune’e ba oin Uniaun Europeia hakarak serbisu hamutuk ho CCI-TL ba iha setór oioin.
Jornalista: Arminda Fonseca
Editora: Maria Auxiliadora
