OEKUSI, 25 Abríl 2026 (TATOLI)—Koordenadór Zona Ekonomia Espesiál Dezenvolvimentu Oekusi Ambenu (ZEEDOA), Herculano de Sousa, ‘dúvida’ ho desizaun Governu kona-ba ezonerasaun no nomeasaun estrutura iha Rejiaun Administrativa Espesiál Oekusi Ambenu (RAEOA) tanba la inklui ZEEDOA.
“Ha’u dúvida hela atu kontinua ka para ona, tanba uluk Governu nomea ha’u ho rezolusaun hanesan, maibé agora atu hasai ha’u ne’e laiha baze ida atu ha’u sai ka kontinua. Uluk nomea ami dala ida de’it ho Prezidente Autoridade RAEOA,” nia hateten ba TATOLI via telefónika, Sábadu lorokraik ne’e.
Notísia relevante: PM Xanana nomea Régio da Cruz sai Prezidente Autoridade RAEOA
Tanba ne’e, nia dehan, iha semana oin, loron-Segunda 27 Abríl 2026, ofisialmente sei entrega relatóriu finál ba Prezidente Autoridade RAEOA.
“Ha’u-nia karreta horisehik ha’u entrega ona ba patrimóniu Estadu. Semana oin mak estrega relatóriu, tanba ha’u tama ho odamatan sai mós ho odamatan,” nia afirma.
Notísia relevante: http://Herculano Sousa prioriza asuntu tolu durante lidera ZEEDOA iha Oekusi
Tuir nia, loloos Governu mós hasai desizaun ofisiál ida kona-ba mandatu no funsionamentu ZEEDOA nian, atu termina ka kontinua.
Notísia relevante: Xanana: “Aban, Konsellu Ministru estraordináriu diskute ajenda rua foku ba RAEOA”
Jornalista: Abílio Elo Nini
Editór: Xisto Freitas da Piedade
