DILI, 27 Abríl 2026 (TATOLI)-Xefe bankada Partidu Kongresu Nasionál Rekonstrusaun Timorense (CNRT, sigla portugés), Patrocínio dos Reis Fernandes, apela ba kuadru no militante sira hotu atu respeita líder nasionál nian.
Nia hato’o mensajen liuhusi intervensaun iha reuniaun plenária Parlamentu Nasionál, relasiona ho komemorasaun loron aniversáriu Partidu CNRT, ohin, ne’ebé kompleta ba da-19.
Hodi bankada nia naran deputadu parabeniza kuadru no estrutura tomak partidu nian husi nasionál to’o baze.
“Husu kontinua firme fó apoiu morál polítika ba ita-nia líder sira hotu nasaun ni’an, hodi kontinua defende soberania Estadu nian no dezenvolvimentu ba povu tomak”, nia hato’o.
Mariano Malik, deputadu husi bankada Partidu Demokrátiku (PD), felisita mós Partidu CNRT ba ninia aniversáriu atu nafatin harii, haburas no hametin, hodi sai instrumentu polítiku ida ba dezenvolvimentu nasionál hodi nafatin serbí povu no nasaun.
Jornalista: Nelson de Sousa
Editora: Maria Auxiliadora
