DILI, 27 Abríl 2026 (TATOLI)—Prezidente Bee Timor-Leste, Empreza Públika (BTL, E.P), Gustavo da Cruz, hateten BTL sira aplika tarifa ba utilizasaun sanitáriu públiku atu eduka no garante ijiene iha sidade laran.
Nia hatutan, durante tinan-24 Timor ukun-an Governu fó asesibilidade sanitáriu públiku ho gratuita, Estadu mak hasai osan no bainhira fasilidade sanitária intupidu Estadu mak kontinua tau atensaun.
“Komunidade gosta uza maibé la kuidadu fasilidade públiku hanesan gosta tinta naran no liafuan má edukadu ba parede sira, nune’e BTL hakarak halo jestaun ba hadi’a kualidade moris no ijiene iha sidade ne’e, entaun ita aplika koima,” Prezidente BTL ne’e hateten ba jornalista iha nia kna’ar fatin, ohin.
Prezidente ne’e destaun atu rekolla koima no tau matan ba fasilidade públiku BTL destaka hela pesoál ida hodi hein, maske antes ne’e sira hein durante tinan haat ho gratuitamente, nune’e tempu ona atu eduka ita-nia populasaun atu moris tuir ambiente iha sidade nian.
Tanba moris iha sidade tenke moris ho moos no ijiene, BTL aplika tarifa ne’e la’ós atu obriga povu selu, maibé eduka oinsá hatene uza sanitária públiku iha sidade laran, tanba maneira ida-ne’e la’ós de’it iha Timor mak akontese maibé iha nasaun hotu-hotu aplika hodi selu fali pesoál ne’ebé hein sanitária públiku husi loron to’o kalan.
“Nune’e, ha’u husu ba komunidade utiliza sanitáriu públiku atu uza ho responsabilidade no garante nafatin ijiene ne’ebé moos ba ambiente iha sidade laran,” nia dehan.
Entretantu, tarifa ne’ebé Governu aplika ba utilizasaun sanitáriu públiku ho montante sentavu $0.25 ba kada ema ida.
Jornalista : Alexandra da Costa
Editór : Cancio Ximenes
