DILI, 27 Abríl 2026 (TATOLI)—Bee Timor-Leste, Empreza Públika (BTL, E. P) kontinua halo melloramentu ba sistema fornesimentu bee-moos ba postu administrativu haat hanesan Venilale, Letefoho, Laklo no Remexio.
Empreza ne’ebé sei implementa iha postu Venilale mak NJZP 18 Unipesoál, Lda, JV PT. Dimas Kurnia Jaya, iha postu Letefoho implementa husi kompañia LUCRO Unipesoál, Lda, iha postu Lakló implementa husi kompañia RALAN, Lda, no iha Postu Administrativu Reméxio sei implementa husi kompañia LOKOBUI ZACMA Unipesoál, Lda.
Tanba, ohin loron, BTL, E.P, asina kontratu hamutuk ho kompañia manán-na’in sira ba implementasaun projetu refere no empreza sira mak hanesan.
Prezidente Bee Timor-Leste, Empreza Públiku, Gustavo da Cruz, hateten ohin sira halo selebrasaun kontratu ho kompañia haat ba implementasaun sistema fornesimentu bee-moos iha kapitál postu administrativu haat no husi projetu haat ne’e prevee osan hamutuk millaun $2.6 ho totál fasilidade públiku, uma ka’in-2.400 no populasaun hamutuk 13.500.
“Sistema fornesimentu ne’e ita transforma ona sistema rurál ba urbana no kada uma-ka’in sei instala metru kontadór, kontratu ne’e sei implementa durante fulan neen bele mós liu depende ba área kobertura,” Prezidente BTL ne’e informa ba jornalista sira iha nia edifísiu Kaikoli, ohin.
Nune’e, nia dehan, hafoin asina kontratu atu fasilita tékniku BTL hamutuk kompañia sira sei ba halo inspesaun materiál iha fábrika Indonézia antes lori mai Timor.
“Maibé kompañia balun ne’ebé prontu ona entaun iha semana ida-ne’e nia laran mós sira prontu atu implementa depende sira-nia preparasaun, tanba projetu ne’e iha kategória konstrusaun bee-matan, tanke rezervatóriu kanalizasaun (distribuisaun bee), instala metru kontadór,” nia esplika.
Tanba ne’e, nia husu ba kompañia sira atu implementa ho didi’ak atu garante fornesimentu bee-moos ba benefisiáriu sira, aleinde ne’e benefisiáriu sira mós tenke kuidafu fasilidade públiku ho di’ak ka labele estraga kanalizasaun sira.
Entretantu, tuir dadus ne’ebé BTL rejista kona-ba benefisiáriu ne’ebé daudaun ne’e asesu bee-moos hamutuk rihun-32 no konsumidór hirak ne’e mak kontribui reseita hamutuk rihun $569 iha trimestre dahuluk 2026.
Jornalista : Alexandra da Costa
Editór : Cancio Ximenes
