DILI, 27 Abríl 2026 (TATOLI) – Fundu Monetáriu Internasionál (FMI) reafirma nia kompromisu atu hametin parseria ho Timor-Leste ho objetivu atu promove reziliénsia ekonómika, sustenta kreximentu pozirivu no dudu investimentu iha setór privadu.
Kompromisu ne’e hato’o durante enkontru entre Prezidente Repúblika, José Ramos-Horta, no Diretór-Ezekutivu FMI, André Roncaglia, iha segunda ne’e, Palásiu Prezidensiál. Bairu Pité, Dili. Iha sorumutu ne’e, parte rua aborda kona-ba estratéjia atu responde no jere xoke ekonómiku sira ne’ebé mosu hosi konflitu iha Médiu Oriente.
Diretór FMI ne’e louva dezempeñu ekonómiku nasaun nian, ne’ebé hatudu katak setór naun-petróleu kontinua dezenvolve an, enkuantu inflasaun nafatin ki’ik kompara ho nasaun viziña sira seluk iha rejiaun.
Tuir nia, FMI kontinua apoia Timor-Leste liuhusi hametin kuadru institusionál, hadi’ak sistema finanseiru no aumenta asusu ba kréditu ho dalan ne’ebé seguru atu dudu investimentu husi setór privadu. Nia subliña katak progresu ekonómiku tenke lori mós mudansa ba kualidade moris no bem-estar sidadaun hotu.
“FMI hakarak sai parseiru besik ida ho Timor-Leste, hakarak ajuda nasaun ne’e atu harii ninia kuadru institusionál, ajuda sistema finanseiru, no fonese kréditu barak liután ba ekonomia ho dalan ne’ebé seguru atu dudu investimentu husi setór privadu”, nia hateten.
Iha inkontru ne’e, FMI no Prezidente iha intensaun hanesan atu promove kooperasaun ne’ebé kle’an liután hodi garante futuru ekonómiku ne’ebé estavel, inkluzivu, no produtivu ba Timor-Leste.
FMI kontinua apoia Timor-Leste liuhusi asisténsia téknika, konsellu polítika ekonómika, no monitorizasaun makroekonómika nian, ho foka ba hametin jestaun finansa públika, hadi’a administrasaun fiskál (impostu), no diversifika ekonomia hodi hamenus dependénsia ba mina-rai.
Jornalista: Arminda Fonseca
Editora: Maria Auxiliadora
