BAUKAU, 27 Abríl 2026 (TATOLI)—Ministériu Públiku (MP) liuhusi julgamentu iha Tribunál Primeira Instánsia Baukau, Segunda ne’e, alega pena multa ba arguidu hamutuk na’in-32 relasiona ho kazu peská ilegál iha territóriu Timor-Leste.
Arguidu sira dezloka husi Prizaun Dili iha dadeer 06:00-resin no to’o iha Tribunál Primeira Instánsia Baukau iha tuku 09:45 Otl no direta tama sala detensaun antes hala’o julgamentu purvolta tuku 10:30 Otl iha-ne’ebé akompaña kedas husi advogadu privadu José Pedro Camões iha sala julgamentu Tribunál Primeira Instánsia Baukau.
Iha julgamentu ne’e, Ministériu Públiku alega pena multa variedade ba arguidu sira hanesan kapitaun ró ho pena multa $150 multiplika ba loron 120, elementu ró hamutuk na’in-31 hetan pena multa $120 multiplika ba loron-120 no kompañia responsavel hetan kondenasaun multa $200 multiplika ba loron-350.
Aleinde ne’e, Ministériu Públiku mós husu Tribunál atu deside evidénsia sira hanesan ró, ikan no ekipamentu peska atu sai patrimóniu Estadu iha-ne’ebé alegasaun sira-ne’e bazeia ba Kódigu Prosesu Penál artigu 219 kona-ba peská ilegál.
Iha fatin hanesan, defeza ne’ebé reprezenta husi advogadu privadu, José Pedro Camões konsidera valór alegasaun MP kona-ba multa ne’ebé fó-sai ba arguidu sira aas liu kapasidade tanba bazeia ba arguidu sira konfensa rendimentu insufisiente nune’e husu Tribunál atu foti desizaun kumprimentu mós ba konvensaun marítima ne’ebé Timor-Leste rasik ratifika ona iha tinan 2005.
“Defeza entende mak desizaun menus grave ne’e, maibé husik ba Tribunál mak deside ho kolokasaun lei ne’ebé ami sita kona-ba tratamentu internasionál marítima,” Camões esplika.
José Camões relata arguidu sira la prova halo atividade ilegál maibé kruza iha área jurídika tasi Timor-Leste tanba fatór natureza hanesan prinsípiu pasajen inosente no forsa natureza ne’ebé fó impaktu ba ró iha marítima.
Tuir kronolojia, arguidu sira hetan kapturasaun Polísia Nasionál Timor-Leste (PNTL) liuhusi Unidade Polísia Marítima (UPM) purvolta lorokraik tuku 06:00-resin iha loron 17 Abríl bainhira utiliza ró KM Makmur Rejeki Muliah hala’o atividade ilegál iha Tasi Timor iha área entre Beasu no Uatokarbau, Munisípiu Vikeke.
Aleinde asegura arguidu hamutuk na’in-32, iha operasaun referida asegura mós evidénsia seluk hanesan ikan hamutuk tonelada sia-resin, rede arastu inklui ekipamentu peska seluk tan liuhusi patrulla iha-ne’ebé UPM utiliza rápida hamutuk rua ho apoia NRTL Lusitánia ho objetivu reforsa fiskalizasaun no proteje rekursu marítima Timor-Leste.
Ministériu públiku akuza arguidu sira ho Kódigu Prosesu Penál artigu 219 kona-ba peska ilegál ne’ebé dekreve;
- Ema ne’ebé pratika peska iha água marítima nasionál maski laiha autoridade administrativa kompetente nia lisensa ba peska, sei hetan pena prizaun to’o tinan tolu (3) ka multa.
- Kuandu ajente pesoa koletiva ida, sei lori responsabilidade kriminál, nu’udár númeru anteriór, ema ne’ebé, tuir lei, reprezenta pesoa koletiva ne’e, ema ne’ebé hola asaun hanesan pesoa koletiva ne’e nia reprezentante legál, no mós, iha sosiedade ho konstituisaun irregulár, sósiu ka membru sira-ne’ebé autoriza asaun sira-ne’ebá.
- Peska ba subsisténsia doméstika la hetan pena nu’udár númeru 1.
Entretantu, iha julgamentu ba kazu peská ilegál referida rejista iha Tribunál Primeira Instánsia Baukau ho 0024/26.LASIK ne’ebé prezide hosi juiza singulár Maria Modesta Vieira, Ministériu Públiku reprezenta hosi Ambrosio Rangel Freitas no arguidu sira hetan asisténsia legál husi advogadu privadu José Pedro Camões.
Tuir kalendáriu, Tribunál Primeira Instánsia sei kontinua halo julgamentu ba kazu peská ilegál hodi foti desizaun ikus iha loron-Sesta, 01 Maiu.
Jornalista: Natalino Belo
Editór: Xisto Freitas da Piedade
