OEKUSI, 27 Abríl 2026 (TATOLI) – Porta-vos Polísia Siéntika Investigasaun Kriminál (PCIC, sigla portugés), Inspetór Xefe Polísia, Mario Tavares, ‘lakohi’ fó komentáriu kona-ba rezultadu buska no apreensaun hala’o iha Gabinete Prezidente Autoridade Rejiaun Administrativa Espesiál Oekusi Ambeno (RAEOA), segunda-feira ohin.
Prosesu buska apreensaun ne’e ba fatin rua, hanesan Gabinete Prezidente Autoridade RAEOA no Diresaun Rejionál Finansa, ne’ebé komesa husi tuku 08:30 remata iha tuku 16:00
“Ohin iha prosesu ne’e, ha’u laiha komentáriu, tanba serbisu sei la’o hela, kona-ba asuntu saida, ida-ne’e mós ha’u laiha komentáriu,” nia hateten ba jornalista sira iha Gabinete Diresaun Finansa Oekusi, lorokraik ne’e.
Notísia relevante:Última hora: PCIC halo buska no apreensaun iha Gabinete PA RAEOA
Observasaun jornalista Ajénsia Tatoli,I.P, observa PCIK to’o iha Gabinete PA RAEOA iha tuku 07:30 hodi hein Prezidente Autoridade RAEOA. Hafoin tuku 08:30 Prezidente Autoridade RAEOA to’o iha nia Gabinete.
Hofoin ne’e, Prezidente Autoridade RAEOA mós komprimenta no kaer liman ho parte PCIK sira, no kontinua akompaña kedas Prezidente tama ba nia serbisu fatin, maibé la autoriza mídia sira atu asesu.
“Favór ida, mídia sira labele tama, hein iha liur de’it, sai mai mak intervista,” Porta-vos PCIK, Inspetór Xefe Polísia, Mario Tavares, ba jornalista sira iha parte dadersan.
Jornalista: Abílio Elo Nini
Editór: Rafael Ximenes de A. Belo
