DILI, 27 Abríl 2027 (TATOLI) – Prezidente Parlamentu Nasionál (PPN), Maria Fernanda Lay, atualiza Prezidente Repúblika, José Ramos-Horta, kona-ba rezultadu ba nia vizita ofisiál foin lalais ba estrajeiru.
Tuir nia esplika, antes viajen bá rai-li’ur simu mensajen husi Prezidente Republika ne’ebé husu apoiu husi Portugál ba prosesu instalasaun Tribunál Supremu Justisa iha Timor-Leste. Durante nia vizita, nia hato’o pedidu ne’e ba autoridade Portugál sira, ne’ebé hatudu prontidaun atu fó apoiu, liuliu iha prosesu selesaun juis sira.
“Ha’u hetan Prezidente Konsellu Superiór Majisratura Portugál ne’ebé sei ajuda Timor-Leste durante ita instala Supremu Tribunál tuir intensaun Prezidente Repúblika nian”, Fernanda Lay hateten iha Palásiu Prezidensiál, Bairu Pité, Dili.
Relativamente ba kandidatu sira, nia esklarese katak prosesu selesaun ne’e kompeténsia husi Konsellu Superiór Majistratura Portugál nian, ne’ebé sei aprezenta kandidatura sira. Tuirmai, Komisaun ida ne’ebé instala iha Parlamentu Nasionál, ho reprezentante husi Prezidente Repúblika no Parlamentu, mak sei responsabiliza ba selesaun.
“Portugál hato’o katak ba Timor-Leste sira sei laiha rezerva. Klaru katak sira haruka ema mai, ita mak sei selu sira-nia subsídiu durante sira halo serbisu iha ne’e, durante selesaun, no teste ne’ebé sei hala’o ba ita-nia juis sira”, nia dehan.
Kona-ba prosesu rekrutamentu juis, nia indika katak prosesu sei la’o hela. Komisaun sei haruka karta ofisiál ba Prezidente Konsellu Superiór atu prosesa hodi identifika kandidatura sira ne’e.
“Ba instalasaun Tribunál Supremu nian ita prevee antes fim do ano, tanba Komisaun ne’e [nia mandatu] ba tinan ida nian”, dehan.
Jornalista: Arminda Fonseca
Editora: Maria Auxiliadora
