VIKEKE, 27 Abríl 2026 (TATOLI)—Diretór Servisu Saúde Munisípiu (SSM) Vikeke, Aljaksono S. Maia, klarifika katak abitante sira hulan pasiente ida husi Suku Babulu, Postu Uatulari ne’e tanba kondisaun estrada grave halo ambulánsia labele asesu.
“Hulan pasiente iha Kuarta (22/04) tanba estrada bá pasiente nia rezidénsia kondisaun grave. Tanba ne’e mak família husi pasiente sira deside hulan no akompaña pesoál saúde sira lori bá fasilidade saúde. La’ós ita-nia transporte ambulánsia laiha. Agora daudaun ne’e udan, estrada aat, difikulta ambulánsia,” Aljaksono S. Maia ba TATOLI iha Postu Vikeke Vila, Segunda ne’e.
Diretór SSM Vikeke ne’e hatutan parte saúde nian esforsu tomak halo oinsá mak pasiente bele mai iha fasildade hodibele hetan atendimentu ne’ebé dignu.
Tanba ne’e, nia husu ba família pasiente sira koopera ho parte saúde hodibele tulun pasiente bele evakua ba fasidade ne’ebé mak besik, tanba problema saúde ne’e problema integradu ne’ebé presiza parte hotu nia tulun.
Iha fatin ketak, enfermeiru Sentru Saúde Uatulari, Rosito Aparício Gusmão, reforsa daudaun ne’e estrada husi Suku Afaloikai liga bá Suku Babulu kondisaun grave, nune’e karreta ambulánsia multifunsaun labele to’o iha pasiente nia fatin, tan ne’e família sira deside hulan pasiente.
“Impaktu husi estrada nune’e ami ho ambulánsia ba hein iha dalan mak tula pasiente. Pasiente ne’e moras grave, ne’ebé família sira hulan purvolta kilómetru ida hafoin to’o iha ambulánsia hodi transfere pasiente. Pasiente ne’e ami transfere ona ba internamentu Vikeke,” nia haktuir.
Entretantu, pasiente Maria Pascoal, idade 86, husi Aldeia Asamuta, Suku Babulu, Postu Uatulari, enfrenta moras insufisiénsia kardiáka.
Antes ne’e, Diretór Ministériu Obra Públika (MOP) Vikeke, Casildo Gomes, haktuir kona-ba estrada iha Postu Uatulari tinan ida-ne’e iha pakote hitu, inklui estrada sira iha suku Babulu ne’ebé daudaun ne’e kondisaun grave.
“Estrada sira-ne’e tama ona iha prosesu, ne’ebé ita hein. Bainhira prosesu sira-ne’e hotu sei tama ba reabilitasaun,” nia tenik.
Jornalista: Vitorino Lopes da Costa
Editór: Xisto Freitas da Piedade
