BOBONARU, 27 Abríl 2026 (TATOLI) – Uma hitu, inklui edifísiu Eskola Bázika Filiál (EBF) Molop-Taz, iha suku Molop, munisípiu Bobonaru, hetan amesan forte husi rai-halai tanba instabilidade rai no udan ho intensidade boot ne’ebé seidauk para.
Rai-halai ne’ebé akontese iha sábadu semana kotuk destrui ona uma haat no estrada iha área ne’e, depoizde udan-boot.
Xefe suku Molop, António Maia, afirma katak situasaun ne’e kontinua sai preokupante, tanba rai-mamar hotu ona no to’o agora udan la para.
“Uma haat ne’e hori kalan rai-taka tomak tiha ona. Agora, uma hitu no edifísiu EBF Molop-Taz kontinua iha ameasa boot, tanba rai husi leten ne’e nakfera maka’as. Dalaruma udan maka’as, bee tama tiha ku’ak no deskola fali bá iha rai-okos, bele [provoka rai-monu] ne’ebé taka hotu uma sira ne’e”, nia dehan via telefone, ohin.
Tuir António Maia, dezastre naturál la kauza ema lakon vida, maibé provoka danus ba sasán no produtu agríkola komunidade nian.
“Sasán balu kosenge hasai, maibé ai-han balun labele hasai tanba momentu ne’e kalan, udan mós boot, rai mós tun neineik-neineik. Sira trauma husik hela de’it ona, maibé agora vítima sira muda hotu ona bá família sira-nia uma”, dehan.
Rai-halai ne’e difikulta mós sirkulasaun komunidade entre aldeia Omelai, Anapal, to’o Molop-Taz.
“Estrada aat totál, motór mós liu bá-mai susar. Agora labele liu, rai-naruk maka’as ne’ebé ita atu leba motór mós susar”, nia dehan.
Autoridade lokál hato’o ona situasaun ne’e ba Autoridade Protesaun Sivíl (APC) ho entidade kompetente balun, no husu intevensaun urjente Governu nian.
Notísia relevante: Rai halai estraga uma-lisan rua iha Molop
Jornalista: Sergio da Cruz
Editora: Maria Auxiliadora
