DILI, 28 Abríl 2026 (TATOLI) – Parlamentu Nasionál aprova pedidu dezlokasaun Prezidente Repúblika, José Ramos-Horta, bá Papua Nova-Giné no Austrália, entre loron 11 no 14 Maiu 2026.
“Rezultadu votasaun a favór 36, kontra 0 no abstensaun 1, ne’ebé pasa”, anunsia Maria Fernanda Lay, Prezidente Parlamentu Nasionál, ohin, iha sala plenária.
Vise-Sekretária Meza, Maria Tereza da Silva Gusmão, pleitura rosede pedidu ne’e, tuir termu previstu iha artigu 80 no alínea h númeru 3 artigu 95 Konstituisaun, ho meiu ida-ne’e Xefe Estadu solisita ba Parlamentu Nasionál koñesimentu préviu dezlokasaun ofisiál.
Vizita ofisiál bá Papua Nova-Giné hodi responde ba konvite husi Primeiru-Ministru, James Marape, atu partisipa Simeira Oseanu Melanéziu, ne’ebé realiza iha Port Moresby.
Aleinde ajenda ofisiál, iha mós vizita privada bá Darwin, Australia, entre loron 13 no 15 Maiu 2026, hodi partisipa iha serimónia atribuisaun grau Doutor Honoris Causa husi Charles Darwin University, ne’ebé previstu iha loron 14 Maiu, iha kampus Casuarina.
Vizita ida-ne’e bazeia ba konvite husi Reitora Interina no Prezidente Charles Darwin University, Fiona Coulson. Xefe Estadu sei filafali mai Dili iha loron 15 Maiu.
Jornalista: Arminda Fonseca
Editora: Maria Auxiliadora
