VIKEKE, 29 Abríl 2026 (TATOLI)—Koordenadór Ministériu Obra Públika (MOP) Munisípiu Vikeke, Mário Ângelo Menezes informa, kona-ba preokupasaun komunidade ba estrada Uatakaelale husi Suku Babulu ne’ebé kotu, MOP sei koordena ho empreza Bere Is Back normaliza hodi fasilita movimentu sira.
“Kona-ba rai halai iha área Uatakaelale, Suku Babulu hodi afeta ba estrada kotu, ha’u orienta ona tékniku husi MOP bá haree kondisaun estrada ne’e hodi halo koordenasaun ho empreza Bere Is Back, atu hahú halo normalizasaun inklui konstrusaun permanente tanba empreza ne’e mak manán-na’in projetu,” Mário ba TATOLI iha Postu Vikeke Vila, Tersa ne’e.
Nune’e, nia dehan, MOP iha dalan alternativu ida hodi orienta empreza sira hahú servisu hodi responde imediata ba estrada sira parte Uatakaelale ne’ebé risku ba movimentu sira.
“Daudaun ne’e ita sei fó tempu loron-lima (5) ba empreza sira-ne’ebé hakarak halo reklamasaun. Maibé, liu ida-ne’e ami komesa halo kontaktu ba empreza sira haree ba servisu sira-ne’ebé nesesidade hodi hein prosesu kontrata. Tanba kontratu entre MOP no empreza sira-ne’e ita asina hotu iha munisípiu Vikeke. Obra reabilitasaun ba tinan ida-ne’e, Munisípiu Vikeke hetan pakote ualu (8), Postu Ossú ida no Postu Uatulari pakote hitu (7). Tuir planu, obra referida sei implementa iha fulan-Juñu,” nia subliña.
Kona-ba obra reabilitasaun estrada rurál hamutuk pakote ualu ne’ebé implementa iha Munisípiu Vikeke mak hanesan Depalasi (Nahareka), Sta 18+700-21+950, manán-na’in husi empreza Lekuadyti Unip, Lda ho kustu $616.678.00.
Pakote daruak husi Kaikasabu-Haulale, Postu Uatulari, Sta 0+000-4+580, empreza King-Gamboa mak manán, kustu hamutuk $891,844.03. Pakote datoluk Postu Uatulari husi Haulale-Nunumalau, Sta 4+585-9+385, empreza Bere Is Back mak manán ho kustu $963,936.09.
Pakote dahaat husi Postu Uatulari iha Iraler, Darlari I, Sta 2+500-5+500, empreza Ema Horacio Unip mak manán ho kustu $542.631,88. Pakote dalimak husi Postu Uautulari, husi Iraler-Daralari II, Sta 5+500-9+000, empreza Resikou9405 Unip mak manán ho kustu $525.567,39.
Pakote daneen husi Postu Uatulari husi Uatakaelale-Vessoru I, Sta 0+000-4+150, empreza Metaqueli Unip mak manán ho kustu $705.516,31. Pakote dahitu husi Postu Uatulari, husi Vessoru-Uatakaelale II, Sta 4+150-8+300, empreza Seiti Nabilan 28 Unip, Lda, mak manán ho kustu $652.294,68. Enkuantu, pakote daualu husi Postu Uatulari husi Bebui-Uatakaelale, Sta 0+000-3+925, empreza Brother Mean Unip, Lda mak manán ho kustu $755.812,45.
Iha sorin seluk, empreza Bere Is Back, Luis Bernardo Gamboa, haktuir kona-ba normaliza estrada empreza Bere Is Back hakarak kontribui gratuita ba povu, maibé daudaun ne’e impaktu klíma udan hela de’it, hodi difikulta servisu iha terenu.
“Ha’u hakarak ajuda gratuita tanba interese ba povu doben ida-ne’e, maibé parte Estadu ohin mai haree ona, agora klima (udan) mós la fó tempu ba ita hodi halo servizu normalizasaun, atu fasilita movimentu sira,” nia akresenta.
Jornalista: Vitorino Lopes da Costa
Editór: Xisto Freitas Piedade
