KOVALIMA, 29 Abríl 2026 (TATOLI)- Prezidente Repúblika (PR), José Ramos Horta husu ba Autoridade Munisipál Kovalima labele husik ferik no katuas no oan ki’ak sira hamlaha no laiha uma dignu atu hela.
“ Ha’u husu ba Autoridade sira iha-ne’e xefe Aldeia, suku bainhira ita boot sira rona karik família ruma difisil tebes presiza ajuda liuliu buka dalan atu apoia, nune’e labele iha família ka povu ida moris iha hamlaha no hela uma ida la dignu bainhira iha bele kontaktu ba prezidénsia, nune’e ami buka atu ajuda”, Xefe Estadu husu ba autoridade sira iha Kovalima.
Gabinete Palasiu Prezidénsia presiza apoia lalais liu ba família kbiit,ferik, katuas, nune’e sira labele hamlaha no bele hela iha uma dignu.
“Ita nia Governu halo planu bo’ot, nune’e atu responde presiza tempu, maibé Prezidénsia lais liu atu responde ba familia kbiit kla’ek sira. Tanba hanesan ohin simu informasaun semana ida iha ona orsamentu atu apoia”, katak Xefe Estadu.
Munisípiu Kovalima iha nia postu Administrativu mak hanesan Fatululik, Fatumea, Fohorem, Tilomar, Maucatar , Suai no Zumalai iha nia suku 30 no Aldeia 148.
Jornalista:Celestina Teles
Editór: Florencio Miranda Ximenes
