DILI, 29 Abríl 2026 (TATOLI) – Timor-Leste partisipa iha Simeira Xina Dijitál ba da-9, iha Fuzhou, Provínsia Fujian, Xina, nu’udar parte ida husi ninia esforsu atu avansa transformasaun dijitál no hametin kooperasaun internasionál iha setór teknolojia.
Eventu ne’ebé hala’o entre loron 29 no 30 Abríl ne’e Timor-Leste reprezenta husi António Ramos da Silva, nu’udar delegadu Timor-Leste nian iha Sekretariadu Permanente husi Fórum ba Koperasaun Ekonómika no Komersiál entre Xina no País sira Ko’alia Lian Portugés nian, koñesidu mós hanesan Fórum Makau.
Simeira anuál ne’e halibur ofisiál sira Governu nian, peritu sira teknolojia nian no reprezentante sira indústria nian hodi hatudu avansu dijitál sira, promove inovasaun no aprofunda kolaborasaun internasionál.
Edisaun tinan ida-ne’e nian hala’o ho tema “Aselera Inovasaun no Dezenvolvimentu Iha Teknolojia Dijitál sira no Aprofunda Konstrusaun Xina Dijitál”.
Programa ne’e inklui eventu 50 diálogu ne’ebé foka ba teknolojia emerjente sira, inovasaun dijitál no aprezentasaun ba realizasaun téknika sira, inklui inisiativa sira ne’ebé dezenvolve husi instituisaun akadémika sira no empreza teknolójika sira.
Iha loron dahuluk husi simeira ne’e, reprezentante timoroan, tuir ajenda, sei partisipa iha fórum paralelu ida kona-ba ekonomia dijitál no vizita pavillaun espozisaun nian. Iha loron 30 fulan-Abril, delegasaun ne’e sei vizita empreza teknolojia oioin hodi aprende kona-ba solusaun no aplikasaun sira transformasaun dijitál nian.
Timor-Leste nia partisipasaun iha simeira ne’e aliña ho prioridade nasionál sira hodi hametin setór dijitál nasaun nian, partikularmente liuhusi implementasaun planu estratéjiku Timor Dijitál 2032 no preparasaun sira ba Estratéjia Transformasaun Dijitál 2026-2036.
Tanba antes ne’e Ministériu Transporte no Komunikasaun (MTK) realiza semináriu Konsulta Públika kona-ba estratéjia transformasaun dijitál nian ne’ebé hala’o iha loron 16 no 17 fulan-Abríl.
Jornalista: Arminda Fonseca
Editora: Maria Auxiliadora
