Asosiasaun HAMMOS relata servisu voluntáriu ba Xefé Estadu

Dili 30 Abril (TATOLI)—Prezidente Repúblika, José Ramos-Horta, kinta ne’e, hasoru malu ho Prezidente Ezekutivu Asosiasaun Habelar Matenek ba Moris Saudavél (HAMMOS), Bonifácio da Silva de Jesus, ho ekipa hodi relata servisu voluntáriu ne’ebé asosiasaun ne’e halo durante ne’e.

“Ami-nia atividade rua (2) ne’ebé mak importante, ida mak hare’e liu ba edukasaun, ba eduka peer-to-peer ba estudante sira liuliu ba moras sira hada’et husi relasaun seksuál, saúde reprodutiva, moras infesaun sira hanesan dengue, tuberkuloze inklui mós moras króniku sira ne’ebé mak iha ita-nia rai hanesan raan-midar no tensaun. Ami-nia atividade sira-ne’e mak durante ne’e ami hala’o no ami mai hasoru Prezidente Repúblika hodi informa,” Bonifácio da Silva de Jesus hateten ba jornalista sira hafoin remata enkontru ho Xefe Estadu iha Palásiu Prezidensiál Nicolau Lobato, Bairru Pite.

Nia dehan, objetivu relata atividade voluntariu ne’e ba Xefe Estadu oinsá iha oportunidade Prezidente Repúblika bele fó apoiu atu haboot liutan ezisténsia asosiasaun nian hodi hala’o servisu ba ema ki’ak sira.

“HAMMOS mós hala’o atividade iha munisípiu sira hodi apoiu komunidade iha área rurál ne’ebé dook husi sentru saúde atu fahe informasaun no halo konsultasaun jerál. Ami sira iha asosiasaun laran mesak eskola hotu iha área saúde, balun edukasaun no seluk tan maibé ami kompleta malu,” nia dehan.

Atividade ne’ebé HAMMOS hala’o ba munisípiu sira hodi vizita ba eskola sira, fahe informasaun kona-ba moras sira-ne’ebé mosu barak iha nasaun ne’e no fó mós konsulta masál ba estudante sira liuhusi teste ba moras fuan, pulmaun kanek no seluk tan.

‎”Ita ba munisípiu, ita fahe informasaun sira ba eskola sira, ita aproveita mós fó atendimentu konsulta jerál, konsulta jerál inklui konsulta ba moras sira-ne’ebé mak komun iha ita-nia rai ne’ebé frekuente mak tensaun, moras sira-ne’ebé mak infesaun respiratóriu, tuberkuloze. Nune’e mós ita hetan apoiu husi ita-nia parseiru sira durante apoiu ami hanesan Menzies, Maluk Timor, sira-ne’e hotu mak apoiu ami atu fó konsulta no leno ba ita-nia maluk sira, halo screening ba ema sira-ne’ebé ho problema fuan, leno ba inan-isin-rua sira,” nia afirma.

‎Servisu voluntáriu ne’ebé HAMMOS halo kobre ona ba munisípiu sira hanesan Aileu, Ainaru, Likisá, Manatutu no Oekusi no konsege moras ne’ebé ho númeru aas liu mak Infesaun Vias Respiratóriu Aguda (IRA)).

‎”Durante ita halo konsulta ne’e, númeru pasiente sira-ne’ebé aas liu mak moras IRA, moras sira hanesan diarreia no moras sira ne’ebé mais importante. Ita presiza halo transferénsia ka konsulta iha área espesializadu sira mak hanesan moras fuan, hanesan Rheumatic Heart Disease, ne’ebé hetan apoiu husi kolega sira durante servisu iha área ne’e leno ema-nia fuan, no inklui inan-isin-rua sira ne’ebé ita leno. Karik iha kondisaun ruma presiza konsulta espesialista sira, ita halo planu ba kontinua sira-nia segimentu ka konsulta iha área sira-ne’e,” nia hateten.

‎Kona-ba kazu grave sira, Bonifácio esplika, maske sira voluntáriu, sira nafatin halo koordenasaun ho sistema saúde nasionál. Bainhira deteta pasiente ho kondisaun krítiku, ekipa HAMMOS halo transferénsia ba Sentru Saúde ka Ospitál Referál no Nasionál hodi hetan tratamentu espesializadu.

Entretantu, durante reuniaun Xefe Estadu hato’o agradesimentu no apresia ba servisu ne’ebé HAMMOS hala’o, tanba iha indikasaun pozitivu oinsá bele tulun komunidade iha área rurál.

Jornalista : Hortencio Sanchez

Editór        : Cancio Ximenes