VIKEKE, 31 Abríl 2026 (TATOLI)—Organizasaun Internasionál Food and Agriculture Organization (FAO), oferese formasaun ba grupu agrikultura sira iha Postu Uatulari, Munisípiu Vikeke kona-ba jestasaun ekipamentu no manutesaun hand tractor.
Iha formasaun ne’e, reprezentante FAO, Filipe da Costa, haktuir FAO implementa programa iha Postu Uatulari hodi hametin sistema ai-han ka reziliente, tanba ne’e FAO kontinua apoia formasaun jestaun mekanizasaun ba grupu agrikultór sira.
“FAO servisu hamutuk ho Governu ba implementasaun sistema produsaun ai-han. Implementasaun programa ai-han ne’e ami oferese ona ekipamentu hand tractor ki’ik hamutuk 28 no makína sama hare unidade 28 ba grupu agrikuktór 28 iha suku ualu (8) iha Postu Uatulari. Tan ne’e mak ami mai oferese formasaun ba ita-nia agrikultór sira hodi halo jestaun ba ekipamentu sira-ne’ebé oferese ona ba grupu,” Filipe da Costa hateten iha Sentru Asosiasaun Haburas Fini Uatulari, Kinta ne’e.
Nia esplika formasaun ne’e nia objetivu atu ajuda grupu sira bainhira ekipamentu hand tractor aat sira bele halo manutesaun.
“Ami mós kapasita grupu sira oinsá servisu transparénsia iha grupu laran, atu labele hamosu konflitu iha grupu, nune’e grupu sira foku ba hasa’e produsaun,” nia hato’o.
Iha formasaun ne’e, ekipa FAO distribui mós livru manuál monitorizasaun no jestaun nian ba grupu agrikultór 28 inklui ba estensionista sira iha Postu Uatulari hodi uza ba monitoriza grupu sira-nia atividade natar.
Iha fatin hanesan, Reprezentante Administradór Postu Uatulari, João Lemos, haktuir inísiu husi Timor-Leste restaura independénsia Governu no parseiru sira apoia beibeik grupu sira maibé to’o agora tratór pardeiru laiha.
“Tan ne’e, iha oportunidade ne’e ha’u hakarak agradese ba FAO apoia ekipamentu agríkola ba grupu agrikultura husi suku ualu. Ha’u husu ba grupu sira labele banati tuir grupu sira pasadu ne’ebé hetan tratór ema ida rua mak sai benefísiáriu, maibé ekipamentu ne’e tenke ba membru grupu sira,” nia fó-hanoin.
Entretantu, programa FAO ne’ebé implementa iha Postu Uatulari foku ba natar ne’ebé implementa husi grupu 28 ho totál natar hamutuk ektare 540.
Partisipa iha formasaun ne’e kompostu husi autoridade lokál, Polísia Nasionál Timor-Leste (PNTL) Eskuadra Uatulari, grupu agrikultura 28 iha-ne’ebé kada grupu reprezenta ema na’in-tolu (3) inklui estensionista. Formasaun ne’e hala’o durante loron ida.
Jornalista: Vitorino Lopes da Costa
Editór: Xisto Freitas Piedade
