DILI, 30 Abríl 2026 (TATOLI)—Konsellu Ministru delibera no autoriza despeza kontratu konstrusaun ba projetu irrigasaun Laueli, iha Suku Asulau iha área Saré, Postu Administrativu Hatulia A, Munisípiu Ermera, ho montante millaun $10,25, ne’ebé aprezenta husi Ministru Agrikultura, Pekuária, Peska no Floresta, Marcos da Cruz.
“Proposta ida-ne’e foin mak hetan autorizasaun despeza, tanba tuir lei orsamentu liu millaun $10, tenke hetan aprovasaun husi Konsellu Ministru,” Ministru Agrikultura, Pekuária, Peska no Floresta (MAPPF), Marcos da Cruz, hateten ba jornalista iha Palásiu Governu, ohin.
Nune’e, nia dehan, hafoin hetan autorizasaun mak foin loke prosesu aprovizionamentu iha Sentru Nasionál Aprovizionamentu ba prosesu konkusru públiku foin bele hetan kompañia manán-na’in.
“Projetu ne’e tenke loke prosesu aprovizionamentu no implementa iha tinan ida-ne’e, maibé prosesu atu konklui ne’e tenke to’o durasaun tinan rua,” nia dehan.
Iha biban ne’e, Vise-Ministru ba Asuntu Parlamentár, Adérito Hugo da Costa, reforsa tan katak setór agrikultura nafatin sai atensaun ba infraestrutura bázika, ne’ebé oinsá atu hakbiit agrikultór sira iha Timor-Leste.
Tanba, nia dehan, durante ne’e Governu konstrui ona irrigasaun iha parte Lautein, Víkeke, Bobonaru, Baukau, maibé ohin loron MAPPF aprezenta fali proposta konstrusaun irrigasaun ba munisípiu Ermera, ne’ebé mós fó benefísiu ba natar-na’in sira iha munisípiu Líkisa.
“Aprovasaun ne’e kontinua fó andamentu programa iha setór agrikultura hodi haree ba nesesidade konstrusaun infraestrutura bázika. Fiar katak, iha inísiu fulan-Abríl ministériu bele hahú halo ona ninia servisu,” nia esplika.
Governante ne’e dehan, atu eleva setór agrikultura tenke garante mós infraestrutura estrada, tanba ne’e mak kestaun ida-ne’e sai hanesan programa prioridade Governu konstitusionál da-sia (IX) nian hodi kompleta kompromisu eleva liña konetividade iha territóriu nasionál.
Jornalista : Alexandra da Costa
Editór : Cancio Ximenes
