DILI, 30 Abríl 2026 (TATOLI)—Event Organizer (EO) Klan Entertainment halo eventu anuál Klan Music Festival Mega Amplification durante loron tolu hahú husi loron 30 Abríl to’o loron 02 Maiu iha Portu Dili, atu promove múzika Timor-Leste ba mundu.
“Objetivu husi Music Festival Mega Amplification ne’e hanesan kada tinan ita sempre halo hodi selebra talentu Timor nian, hodi fó plataforma ba talentu Timor hodi hatudu sira-nia ezisténsia ne’ebé mak boot atu promove múzika Timor-Leste ba mundu,” Vocalis Iscal, Claudio de Araujo, dehan banhira halo konferénsia imprensa iha Lecidere, ohin.
Husi Music Festival Mega Amplification ne’e atu promove mós produtu lokál Timor nian ne’ebé sei faan iha portu ne’eba, nune’e bele hatudu katak Timor-Leste bele halo festival ne’ebé mak padraun internasionál.
“Tanba ne’e mak ita foku maka’as iha ne’eba hodi lori talentu sira-ne’e oinsá bele hatudu ba mundu katak ita mós bele. Tanba ita tenke hatudu ita-nia an ba bainaka sira katak ita artista timoroan mós bele anima ema hanesan Deometrio and BMB BAND, lafaek color, Cleopatra Lfour no sleuk tan,” nia esplika.
Nia haktuir, ba futuru music festival mega amplification sei nafatin halo atividade ida-ne’e atu halibur joven sira ho mundu múzika nian.
Husi festivál ne’e hetan apoiu husi doador sira hanesan Aero Dili, Sabeh, Telkomsel, Zjero, Santos, Nano Sports, Rocella, Quatros Cantos no seluk tan.
Entertantu, eventu anuál klan music festival mega amplification ba da-VI ne’ebé sei hatudu performance husi banda múzika Padi Reborn, banda múzika 510, banda múzika Hip Today, no Indonesian local heroes (DJ).
Jornalista : Felicidade Ximenes
Editór : Cancio Ximenes
