DILI, 30 Abríl 2026 (TATOLI)—Konfederasaun Sindikatu Timor-Leste (KSTL) hakarak foka prioridade ba pontu importante lima hanesan aselera revizaun saláriu mínimu tenke tuir nesesidade bázika moris nian iha tempu agora, seguransa iha servisu fatin, kria empregu, minimiza diskriminasaun no protesaun direitu iha ámbitu komemorasaun loron mundiál ba traballadór.
Notísia Relevante: SEFOPE-CNT finaliza revizaun lei saláriu mínimu husi $115 hasa’e ba $154
Komemorasaun loron mundiál traballadór iha 01 Maiu 2026 ne’e ho tema “Dignifika traballadór nu’udar Heroi Foun ba dezenvolvimentu nasaun: Promove traballu dignu, prospriedade no justisa sosiál”.
Portavóz KSTL, Vieras Tresanta, hateten iha loron mundiál traballadór nian ne’e nu’udar loron vitória ba luta neʼebé naruk husi tempu ba tempu no jerasaun ba jerasaun, hodi nafatin hakilar iha mundu katak harii dame, hametin demokrásia, direitu no servisu dignu ba ema hotu-hotu.
“Hanesan ita hotu hatene katak sempre iha nafatin obstákulu sira neʼebé ita hasoru iha mundu traballu, nune’e presiza nafatin iha forsa ho komitmentu kolletivu husi elementu sosiedade sira hotu, atu nafatin iha kontinuasaun luta forte ba direitu, liberdade, demokrásia, igualdade no justisa sosiál”, reprezentante KSTL informa ba jornalista sira liuhusi konferénsia imprensa iha edifísiu KSTL, Bemori, ohin.
Bazeia ba tema ida-ne’ebé iha reflete ho mensajen katak, iha prosesu dezenvolvimentu nasaun, importante tebes atu garante servisu hotu iha valór, iha kondisaun seguransa, saláriu justu no ambiente ida-ne’ebé livre husi violénsia no asédiu.
“Nune’e, tinan ida-ne’e, Konfederasaun Sindikatu Timor-Leste (KSTL) hakarak foka ba dezafiu boot neʼebé traballadór sira hasoru iha rai-laran, liuliu kona-ba kualidade moris no protesaun legál, aselera lei saláriu mínimu,” nia dehan.
Pontu Importante ne’ebé hato’o iha Komemorasaun ne’e mak dahuluk aselera revijaun saláriu mínimu tenke tuir nesesidade bázika moris nian iha tempu agora.
Daruak, grante seguransa iha servisu fatin estabelese monitorizasaun ne’ebé rigorozu ba kompañia sira hodi garante katak fatin servisu hotu seguru no laiha risku ba traballadór sira-nia saúde.
Datoluk, protesaun ba traballadór informál, tenke rekoñese no fó protesaun sosiál ba sira-ne’ebé servisu iha setór informál, inklui agrikultór no vendedór sira.
Dahaat, mnimiza diskriminasaun ho kualkér forma diskriminasaun iha servisu fatin liuliu hasoru feto no ema ho kbi’it limitadu.
Dalima, Governu Presiza kria empregu iha rai-laran, tenke sai hanesan sentru ba polítika públika.
Entretantu, iha selebrasaun loron mundiál traballadór ne’ebé akontese iha loron 01 fulan-Maiu 2026, KSTL sei halo marsa hamutuk ho traballadór sira hahú husi edifísiu KSTL Bemori to’o Largo Lecidere.
Jornalista : Alexandra da Costa
Editór : Cancio Ximenes
