DILI, 30 Abríl 2026 (TATOLI)—Tribunál Judisiál Primeira Instánsia Dili (TJPID), Kinta ne’e, kontinua halo interrogatóriu judisiál dahuluk ba arguidu na’in-haat sidadaun estranjeiru ne’ebé envolve kazu droga, ne’ebé antes ne’e autoridade sira halo detensaun iha Segunda (27/04).
Ministériu Públiku (MP) husu Tribunál atu aplika Prizaun Preventiva ba arguidu na’in-haat mak hanesan S, IP, YM, no AF, ne’ebé nu’udar sidadaun Indonézia.
Hafoin interrogatóriu dahuluk, Defeza husi arguidu AF, Defensór Públiku Anzelmo Akara, hateten, presiza haree fila fali alegasaun husi MP ba arguidu sira.
“Tenke haree ba iha presupostu, karik iha fundadu perigu nian, nia (arguidu sira) atu halai fundadu perigu, nia atu pertuba investigasaun, nune’e mós fundadu perigu nian atu kontinua atividade kriminozu,” Anzelmo Akara hateten ba Jornalista sira iha TJPID, Kaikoli.
Notísia relevante : Tribunál hahú interrogatóriu dahuluk ba sidadaun estranjeiru haat suspeitadu ba kazu droga
Nia dehan, atu aplika Prizaun Preventiva tenke priense mós ba artigu 183 husi Kódigu Prosesu Penál.
Defeza hatutan, iha alegasaun, defeza husu Termu Identidade Rezidénsia (TIR) enkuantu defeza na’in-tolu seluk, ida husu TIR Aprezentasaun Periódika no proibisaun auzénsia, no Defeza ida husi Arguidu S mak husu kauzaun, maibé depende ba Tribunál nia desizaun.
Nia fundamenta, iha lei númeru 2/2017, kona-ba rejime jurídiku ba tráfiku no kombate konsumu ilísitu droga, atu penaliza ema ida ba krime konsumu sabu-sabu ne’e, ema ne’e tenke konsumu grama 0,2, maibé hafoin Defeza halo kálkulu, katak arguidu na’in-haat ne’e foin konsumu grama 0,125.
“Haree ba faktu ne’ebé akontese, konforme arguidu ne’e lori sabu-sabu ne’e mai nia kuantidade ne’e kiik, grama 0,2, agora liga ba lei ida ohin grama 0,2 ne’e mak kuandu arguidu na’in-haat ne’e konsumu duni ida-ne’e, husi grama 0,2 ita kuandu dividir ba haat, kerdizer nia inferiór ona husi kuantidade ne’ebé lei hato’o, entaun ita labele kondena,” Defeza katak.
Ho nune’e, Defeza husu Tribunál mantein medida koasaun TIR, hafoin investigasaun la’o mak haree.
“Tanba iha duni faktus katak arguidu ne’ebé lori mai, nia rasik deklara lori ho kuantidade grama 0,5, ita dividir ba haat kerdizer na’in-haat konsumu hotu buat ne’e, entaun nia la priese ona lei hateten katak atu kondena ne’e grama 0,2,” nia tenik.
Defensór Públiku ne’e dehan, kuandu Tribunál nia despaisu mak deside aplika Prizaun Preventiva ba nia kliente, maka nia sei halo rekursu hodi rekorre husi TJPID nia desizaun bá Tribunál ida a’as liu.
Jornalista : Natalino Costa
Editora : Julia Chatarina
