DILI, 30 Abríl 2026 (TATOLI)—Governu liuhusi Ministériu Petróleu no Rekursu Minerál (MPRM) sei ba asina nota entendimentu (Mou) ho Governu Brunei Darusalam iha setór enerjétiku.
Ministru Petróleu no Rekursu Minerál, Francisco Monteiro, halo mós aprezentasaun ida kona-ba Memorandu Entendimentu ho Governu Brunei Darussalam, ho objetivu atu hametin kooperasaun iha setór enerjétiku, neʼebé sei asina iha semana oin.
“Ha’u mós halo aprezentasaun kona-ba ha’u-nia akompañaamentu ho Primeiru-Ministru iha Brunei Darusalam no oportunidade ne’e Governu liuhusi MPRM atu asina MoU kona-ba servisu sira iha área mina no gás nian ho Governu Brunei Darusalam,” Ministru ne’e informa ba jornalista ina Palásiu Governu, ohin.
Entendimentu ida-ne’e estabelese kuadru kolaborasaun entre nasaun rua ne’e, ne’ebé foka ba fahe koñesimentu, dezenvolvimentu kapasidade téknika no promosaun oportunidade investimentu liuliu iha área petróleu no gás.
“Kooperasaun ne’ebé prevee ona inklui atividade formasaun no fahe esperiénsia, hala’o estudu konjuntu sira iha área peskiza, esplorasaun, dezenvolvimentu no produsaun nian nomós troka prátika di’ak kona-ba polítika enerjétika,” nia hateten.
Akordu ne’e mós fó dalan ba dezenvolvimentu husi inisiativa sira seluk ne’ebé sei define hamutuk husi parte rua.
Entretantu, hafoin asinatura, Ministériu Petróleu no Rekursu Minerál sei garante implementasaun dispozisaun sira iha memorandu ne’e, iha koordenasaun ho entidade kompetente no tuir lejizlasaun nasionál aplikavel.
Jornalista : Alexandra da Costa
Editór : Cancio Ximenes
