DILI, 30 Abríl 2026 (TATOLI)—Diretor Servisu Saúde Munisípiu Aileu, João de Deus, informa iha trimestre dahuluk (Janeiru-Marsu) ne’e Servisu Saúde Munisípiu Aileu rejista kazu dengue hamutuk 127.
“Kona ba kazu dengue durante fulan tolu, maioria husi postu administrativu Aileu Villa hamutuk 88, Laulara 22, Remexio 19 no Likidoe tolu (3) ne’ebé totál hamutuk 127 no pasiente sira rekupera hotu ona,” João de Deus hateten ba Agência TATOLI liuhusi WhatsApp, ohin.
Nia esplika, kazu dengue ne’ebé rejista ne’e maioria afeta ba ema boot no labarik sira.
“Idade hahú husi tinan ida (1) to’o 25 ba leten, tanba prevenesaun ne’ebé mak ita halo ita kontinua halo promosaun edukasaun saúde atu bele aumenta sira koñesimentu hodi kuidadu an husi moras, tanba udan kontinua iha,” nia afirma.
Nia esplika, durante fulan tolu ne’e Servisu Saúde Munisípiu Aileu halo ona intervensaun hodi fó edukasaun no sensibilizasaun kona-ba saúde públiku ba komunidade.
“Liu-liu halo abatizaun ba uma kain hamutuk 1.283 no fumigasaun halo ona ba uma- kain hamutuk 1093. Tanba ne’e, estoke sufisiente hela atu bele kontinua halo prevensaun, maibé husu nafatin ba komunidade ida-idak halo limpeza iha sira-nia uma, nune’e bele prevene moras sira-ne’e,” nia informa.
Antes ne’e, Diretór Servisu Saúde Munisípiu Dili, Mateus Pinto, hateten kona-ba kazu dengue husi loron 01 to’o 22 fulan-Abríl tinan 2026 ne’e, Servisu Saúde Munisípiu Dili rejista kazu hamutuk 90 no husi númeru ne’e maioria husi Sentru Saúde Komoro.
“Ita ko’alia kona-ba dadus dengue ita iha Abríl loron 01-to’o 22 rejista hamutuk 90, signifika katak esforsu ne’ebé mak ita halo hahú fevereiru mai ne’e la saugate, ita bele dehan esforsu ida ne’e, iha resultadu katak dengue iha Abríl ne’e ita bele hatun, ” Diretór Servisu Saúde Munisípiu Dili, Mateus Pinto, hateten ba Jornalista sira.
Nia dehan, ho kazu 90 ne’e bele halo komparasaun ho fulan Marsu kazu dengue hamutuk 400.
“Entaun ha’u hanoin,karik fulan ne’e ramata ita bele dehan to’o 100 mais ita sei la to’o 200 dalaruma to’o 100 ida de’it karik, tanba ne’e ha’u bele garante katak iha Maiu ita bele redús liután ida-ne’e. Tanba, ha’u hanoin ida-ne’e mak oinsá kontribuisaun husi komunidade no autoridade komunitáriu sira oinsá ita bele redús,” nia dehan.
Nia esplika, kazu 90 ne’e rejistu husi Sentru Saúde haat ne’ebé mak iha Dili laran no maioria husi Sentru Saúde Komoro mak barak liu, depois tuir Bekora, tuir mai Vera-Kruz, depois tuir Formoza no mós klínika privadu sira-ne’ebé mak iha Dili.
Jornalista : Felicidade Ximenes
Editór : Cancio Ximenes
