DILI, 03 Maiu 2026 (TATOLI) – Eskritór indonéziu Lamadi de Lamato hakerek livru ida intituladu “Xanana Sang Pemersatu Timor-Leste”, ne’ebé sei públika husi Kompas Indonézia Printing.
Tuir komunikadu Governu ne’ebé Tatoli asesu, autór ne’e konvida Primeiru-Ministru (PM), Xanana Gusmão, hodi haree diretamente obra, ne’ebé pronta ona ba impresaun iha Kompas, Jakarta, ne’ebé simu husi Vise-Prezidente Kompas, Try Agung Kristanto, akompaña husi funsionáriu sira.
“Obrigadu ba Primeiru-Ministru Xanana Gusmão ne’ebé fó fiar mai ami hodi publika ita-nia livru. Ida-ne’e nu’udár onra boot tebes ba ami”, Try Agung Kristanto agradese.
Xefe Governu, ne’ebé antes ne’e mós hala’o knaar hanesan jornalista, dehan sente onradu bele vizita Kompas.
“Ha’u sente onradu tanba iha momentu ne’ebá bainhira Kompas eziste durante tinan 10, ha’u mós hala’o ona knaar nu’udár jornalista. Ha’u-nia naran kódigu jornalista maka Xanana”, Xefe Governu relembra.
Eskritór Indonéziu, Lamadi de Lamato esplika motivasaun hakerek livru ne’e hahú kedan iha tinan 1996, kuandu nia frekuenta estudu iha eskola An-Nur, iha Dili.
Bainhira konklui estudu iha Dili, Lamadi de Lamato filfali bá Jakarta, ne’ebé hetan sorte di’ak tebes tanba hasoru-malu ho membru komunidade musulmana timoroan sira, liuliu Júlio Tomás Pinto foti nia hanesan oan haki’ak no selu eskola iha universidade to’o remata.
Iha tinan 2002, Lamadi konklui nia universidade iha Jakarta no fila bá Timor, nasaun ne’ebé konsidera hanesan rai ne’ebé nia hela to’o boot.
“Tinan-rua liu tiha ha’u iha Amérika, ha’u mai fali no deside katak tenke halo buat ida no hakerek livru ida kona-ba Timór. Ho ida-ne’e mak ha’u hakerek livru kona-ba Xanana. Tanba tuir ha’u, Xanana hanesan ema ne’ebé importante tebes”, Lamadi de Lamato hateten.
Autór ne’e hakerek ona livru seluk kona-ba líder mundiál sira, inklui ida mak aborda líder ida husi Amérika no livru báada-ruak nian mak kona-ba Xanana Gusmão, ne’ebé sei halo lansamentu iha tempu badak.
Durante vizita, jornalista Kompas mós hala’o entrevista ho Primeiru-Ministru kona-ba integrasaun Timor-Leste (nu’udár membru ba da-11 iha Asosiasaun Nasaun Sudeste Aziátiku (ASEAN, sigla inglés).
Vizita ne’e akompaña husi Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministru Planeamentu no Investimentu Estratéjiku, Gastão Francisco de Sousa, Sekretáriu Estadu Komunikasaun Sosiál, Expedito Dias Ximenes, eis-Ministru Defeza, Júlio Tomás Pinto, eis-Ministru Infraestrutura, Pedro Lay, no Embaixadora Timor-Leste ba ASEAN, Elísia Maria da Silva.
Jornalista: Nelson de Sousa
Editora: Maria Auxiliadora
