DILI, 04 Abríl 2026 (TATOLI)—Governu liuhusi Sekretária Estadu Formasaun Profisionál no Empregu (SEFOPE) liuhusi Dirasaun Nasionál Empregu Estranjeiru (DNEE), husi Janeiru to’o Marsu 2026, haruka ona traballadór timoroan na’in-1400 ba servisu iha rai-li’ur hanesan Austrália, Korea, Nova Zelándia no Japaun.
“Ida-ne’e mak relatóriu atuál ne’ebé mak ami rejista, númeru traballadór boot liu ne’e ba hala’o servisu iha Austrália no Korea,” Diretór Nasionál Empregu Estranjeiru, João Correia, informa ba Agência Tatoli liuhusi telefónika, ohin.
Nia informa, traballadór timoroan sira-ne’ebé servisu iha Austrália hamutuk 1071 ne’ebé kompostu husi feto na’in-262 no mane na’in-809.
Traballadór timoroan, nia dehan, ne’ebé hala’o servisu iha Korea ne’e hamutuk 309 ne’ebé kompostu husi traballadór mene ne’ebé servisu iha área peska hamutuk na’in-234, fábrika hamutuk na’in-67 ne’e kompostu husi mane na’in-64 no feto na’in-tolu (3), no iha área agrikultura ne’e iha traballadór hamutuk na’in-ualu (8) ne’ebé kompostu husi feto na’in-ida (1) no mane na’in-hitu (7).
Enkuantu traballadór ne’ebé servisu iha Japaun ne’e mane hamutuk na’in-10 no iha Nova Zelándia mós iha traballadór timoroan mesak mane hamutuk na’in-10.
Jornalista : Alexandra da Costa
Editór : Cancio Ximenes
