VIKEKE, 04 Maiu 2026 (TATOLI)—Agrikultór husi Suku Bahalaraua’in, Postu Vikeke Vila, Abílio Pinto, husu Ministériu Agrikultura, Peska， Pekuária no Floresta (MAPPF) destaka permanente ekipamentu pezadu (eskavatór) iha irrigasaun Bahalaraua’in hodi halo normaizasaun tanba tempu udan mota tun sempre estraga irrigasaun.
“Tan ne’e, ami hakarak husu ba Governu destaka permanente eskavatór ida iha ami-nia irrigasaun, tanba iha mota ne’ebá ne’e bainhira udan boot, mota estraga hela de’it ami-nia irrigasaun, entaun difikulta ami hodi fornese bee ba ami-nia natar,” Abílio Pinto ba jornalista sira iha Suku Bahalaraua’in, Segunda ne’e.
Nia haktuir daudaun ne’e mota estraga tan tiha ona ne’ebé agrikultór sira halai natar uza de’it udan-been mak halai natar no natar balun seiduak bele halai tanba bee laiha.
Nia relata natar iha área Bahalaraua’in ne’e totál hamutuk ektare 202, irrigasaun hamutuk haat hanesan irrigasaun Beikun, Kaelaran, Ueleku-Bein no Uelelakar, kondisaun irrigasaun sira-ne’e rai taka labele fornese bee ba natar.
Hatán ba preokupasaun ne’e, Ministru Agrikultura, Peska, Pekuária no Floresta （MAPPF), Marcos da Cruz haktuir, kona-ba preokupasaun agrikultór husi Suku Bahalaraua’in ba irrigasaun, kada tinan MAPPF sempre mobiliza ekipamentu pezadu hodi normaliza irrigasaun.
“Maibé, ohin ha’u haree kanál irrigasaun iha mudansa. Mota halai dook husi irrigasaun. Entaun, ohin ha’u kontatu ona ekipa sira hodi destaka ekipamentu pezadu ba irrigasaun Bahalaraua’in ne’ebé orsida ekipamentu sei to’o hodi nornaliza, atu ita-nia agrikultór sira halo sira-nia natar. Ba irrigasaun ne’e, ha’u sei orienta ekipa enjiñeira sei ba haree direta irrigasaun hodi halo kalkulasaun, dezeñu hodi tau planu konstrusaun,” governante ne’e tenik.
Kona-ba natar Kiardekun, Kaenlaran, Welaku Bein, Welele Akar no Nahotas ne’ebé lokaliza iha Suku Bahalaraua’in ne’e sei benefisia uma-kain 101-resin iha Suku Bahalaraua’in.
Jornalista: Vitorino Lopes da Costa
Editora: Xisto Freitas da Piedade
