DILI, 04 Maiu 2026 (TATOLI) – Korporasaun Finanseira Internasionál (IFC, sigla inglés) destaka importánsia asesu ba finansa, informasaun, no rede ba feto emprezária sira iha Timor-Leste hodi haburas kreximentu negósiu no hametin ekonomia nasionál ne’ebé inkluziva.
Regional Manager FIG Advisory/Upstream East Asia and the Pacific IFC, Christina Ongoma, hateten katak asesu ba finanseiru importante tebes tanba feto emprezária sira iha Timor-Leste hatudu determinasaun aas hodi harii sira-nia negósiu, maibé barak sei hasoru nafatin barreira estruturál oioin.
“Feto emprezária sira iha Timor-Leste harii sira-nia negósiu ho determinasaun ne’ebé estraordináriu, maibé hasoru nafatin dezafiu sira atu asesu ba finanseiru, ne’ebé dala barak sai hanesan dezafiu ida tanba menus informasaun negósiu no finansiamentu ne’ebé limitadu no susar atu asesu ba instituisaun finanseira sira”, Christina Ongoma hateten iha ámbitu lansamentu Prémiu Feto iha Negósiu Timor-Leste 2026, iha Palásiu Prezidensiál, Bairu Pité, Dili, segunda-feira ne’e.
Tuir Christina, programa prémiu empreendedora sai hanesan esforsu estratéjiku ida atu rezolve lakuna ida-ne’e liuhusi hasa’e vizibilidade husi feto emprezária sira no habelar sira-nia asesu ba koñesimentu no rede sira.
“Prémiu ida-ne’e bele ajuda negósiu sira ne’ebé feto sira maka na’in atu buras, kria empregu sira, no kontribui ba ekonomia ida ne’ebé inkluzivu liu”, nia hateten.
Hodi esplika katak feto sira iha Timor-Leste hahú, husi Dili to’o munisípiu sira, hala’o papél krusiál iha dezenvolvimentu ekonómiku liuhusi kriasaun empregu, apoiu família, no kontribuisaun ba kreximentu ekonómiku nasionál.
Maibé, dezafiu oioin sei iha, inklui asesu limitadu ba finansiamentu, abilidade sira, rede negósiu sira, no vizibilidade merkadu nian. Tanba ne’e, Prémiu Feto iha Negósiu serve la’ós de’it hanesan serimónia entrega prémiu, maibé mós hanesan plataforma ida atu eleva feto sira-nia lian no enkoraja sira-nia partisipasaun iha setór ekonómiku.
Christina hatutan katak prémiu ida-ne’e mós iha impaktu tanjivel ba destinatáriu sira uluk, inklui aumentu autokonfiansa, habelar rede negósiu sira, formasaun parseria foun sira, no asesu ba oportunidade negósiu sira ne’ebé luan liu.
“Iha IFC, ami fiar katak investe iha feto sira maka movimentu ekonómiku ida ne’ebé matenek. Bainhira feto sira buras, negósiu sira buras, kria empregu sira, no komunidade sira buras”, nia subliña.
IFC hamutuk ho parseiru sira inklui Asosiasaun Feto Emprezariál sira iha Timor-Leste (AEMTL) no Governu sira Austrália no Nova Zelándia nian, iha nafatin kompromisu atu apoia feto sira-nia empoderamentu ekonómiku liuhusi programa oioin, inklui hametin setór finanseiru no harii kapasidade negósiu nian.
Iha okaziaun ne’e, Christina mós konvida feto emprezária, profisionál, no organizasaun sira ne’ebé apoia empoderamentu feto atu partisipa iha Prémiu Feto iha Negósiu 2026 liuhusi fahe sira-nia istória no esperiénsia.
Nia subliña katak prémiu sira-ne’e hanesan plataforma importante ida atu rekoñese matenek amplifika feto sira-nia lian, no inspira jerasaun lider feto sira tuirmai iha Timor-Leste.
Hanesan parte ida husi Grupu Banku Mundiál, IFC nu’udar instituisaun dezenvolvimentu globál ne’ebé boot liu ne’ebé foka ba setór privadu iha nasaun sira ne’ebé dezenvolve hela, ne’ebé hala’o operasaun iha nasaun liu 100.
Iha tinan fiskál 2025, IFC aloka osan billaun $71,7 hodi apoia empreza sira no instituisaun finanseira sira iha nasaun sira ne’ebé dezenvolve hela.
Jornalista: Arminda Fonseca
Editora: Maria Auxiliadora
