OEKUSI, 04 Maiu 2026 (TATOLI) – Iha trimestre dahuluk, husi fulan-Janeiru to’o Marsu inklui fulan-Abríl 2026 ne’e, Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), rekolla ona reseita ba kofre Estadu hamutuk rihun $6,058.00.
Komandante PNTL Oekusi, Superentendente Xefe Polísia, Nicolau Francelino da Costa, esplika, reseita ne’e rekolla mai husi fonte rua, husi serbisu tranzitu rodaviária no Postu Intergradu Sakato.
“Hahú husi Janeiru mai to’o Abríl ne’e hamutuk rihun $6,058.00, taxa ne’e rekolla liuhusi aplikasaun selu multa no evidénsia aprendidu ho totál kategória tuir viatura sira-ne’ebé halo infrasaun tránzitu nian,” nia hateten ba jornalista sira iha Oekusi, ohin.
Notísia relevante:Membru PNTL 21 obrigadu selu koima ba Estadu
Autoridade polísia ne’e esplika, taxa ne’ebé rekolla iha Postu Integradu Sakato hamutuk $2,683.00, ho totál transporte liliu karreta tama no sai hamutuk 174.
Nia hateten, kona-ba pasa-revista liuhusi serbisu tránzitu rodaviária, totál infratór sira hamutuk 11 mai husi tula pasajeiru liu lotasaun kazu ida nia sansaun selu $15.00, utiliza motorizada kanu resin iha rua aplika koima $144.00.
Nune’e mós laiha asesoriu iha ida ho nia koima $12.00, la uza kapasete iha rua selu multa $36.00, data inspesaun liu $10.00, la uza aparellu balun $12.00, laiha ispelu $60.00, laiha xapa matrikula oin no kotuk $60.00, la lori dokumentu iha ida $30.00, kontra sinál tranzitu iha ida $9.00, kontra ordén autoridade tranzitu nian iha infrasaun neen $270.00.
“Ita bele halo auto apreensaun ba sira, hodi kumpre regulamentu tarefa tránzitu nian, maibé aplika sansaun ne’e la hanesan, tanba iha tipu infrasaun, balun lori karreta la ho dokumentu, lori motorizada la ho kapasete no dokumentu la kompletu,”nia afirma.
Nune’e, Komandante PNTL iha RAEOA, hakarak hato’o mensajen ba sidadaun hotu iha territóriu Oekusi, atu koopera hodi labele kontra sinál tránzitu, ba sira-neʼebé utiliza transporte tantu privada no publiku, presiza kumpre regra.
Notísia relevante:Polísia ‘halibur’ $7,008.00 hosi infratór sira
Jornalista: Abílio Elo Nini
Editór: Rafael Ximenes de A. Belo
