DILI, 02 Jullu 2025 (TATOLI)-Membru Polísia Nasionál Timor-Leste (PNTL) na’in-21 obrigadu selu koima ba Estadu tanba komete infrasaun iha rodoviária.
“Pasa-revista ne’e ita prende membru PNTL nia motór hamutuk-21 no karreta rua inklui dokumentu hitu”, informa Diretór Diresaun Tránzitu Seguransa Rodoviária (DTSR), Superintendente Assistente Polísia Luis da Costa, ba jornalista sira iha nia knaar fatin Komandu Jerál Kaikoli, kuarta ne’e.
Husi na’in-21, nia dehan na’in-14 mak kumpre ona dever selu koima ho osan $30, enkuantu na’in-16 seluk seidauk.
Motorizada 21 ne’ebé hetan apreensaun tanba la tau asesoria, la monta espellu no la lori dokumentu motór nian. Enkuantu, dokumentu hitu ne’ebé Tránzitu Seguransa Rodoviária prende ne’e karreta rua mak nia dokumentu invalidu, motorista husi motorizada lima mak nia karta kondusaun seidauk renova.
Luis afirma atividade pasa revista ne’e kontinua la’o. “Ha’u hakarak reafirma tan, Polísia Nasionál Timor-Leste, Tránzitu Seguransa Rodoviária iha munisípiu hotu-hotu katak lei ne’e vale ba ema hotu. Dala ruma públiku kestiona iha mídia sosiál katak PNTL sira asegura malu, maibé hakarak afirma katak ita-nia tratamentu hanesan”.
Nia husu ba membru PNTL sira ne’ebé kontra regra Tranzitu Seguransa Rodaviária nian tenke kumpri lei ba selu koima ho montante $30.00 , antes atu foti fila transporte ne’ebé asegura iha parte seguransa.
Notísia relevante: Semana oin, DNTT-PNTL implementa regra bandu transporte para iha estrada ibun
Jornalista : Natalino Costa
Editora : Rita Almeida
