DILI, 03 Abríl 2025 (TATOLI) – Diresaun Nasionál Transporte Terrestre (DNTT) no Polísia Nasionál Timor-Leste (PNTL), liuhusi Diresaun Tránzitu Seguransa Rodaviária fó sai ba públiku katak, hahú iha loron 07 Abríl, bandu transporte para liu minutu lima iha estrada públiku, hahú husi Rotunda Prezidente Nicolau Lobato to’o Ponte B.J Habibie.
“Atu labele impede movimentasaun rodoviária mak DNTT serbisu hamutuk ho Polísia Tránzitu, ita hahú uluk ho dalan protokolu sira, ita sei halo mós ba dalan sira seluk ne’ebé haree katak karreta no motór para permanente husi dadeer to’o loraik”, Diretora Nasionál Transporte Terrestre, Maria Antónia, hateten iha konferénsia imprensa ne’ebé hala’o iha DNTT, Balide, ohin.
Nia esplika razaun DNTT no PNTL implementa programa ne’e tanba kada loron haree katak veíkulu barak para dalas rua ka tolu ne’ebé afeta tebes ba movimentasaun rodoviária.
“Ho ida-ne’e, ita kordena no orienta rodoviáriu sira atu labele para iha estrada ninin hodi difikulta movimentasaun rodoviária, eseptu para iha parajen ka estasionamentu sira ne’ebé Governu liuhusi autoridade munisípiu Dili prepara tiha ona”, dehan.
Nia apela ba públiku atu kontribui, nune’e neineik maibé beibeik hahú ordena karreta ho motór ne’ebé sempre para iha estrada ninin, liuliu ba loja-na’in sira ne’ebé hahú atividade loke loja no para permanente iha loja oin tanba laiha parajen.
“Bainhira fó avizu tiha mak ema la kumpre no para liu minutu lima maka sei fó sansaun ba sira, tanba kontraorden autoridade tuir dekretu-lei númeru 6/2023 Kódigu Estrada iha artigu 4 no númeru 2 [hateten] selu multa hahú husi $9 to’o $45”, salienta.
Iha fatin hanesan, Komandante Tránzitu Seguransa Rodoviária Nasionál, Asistente Superintendente Xefe Polísia Luís da Costa, dehan antes implementa parte Tránzitu hamutuk DNTT sei halo mós sensibilizasaun iha terrenu.
“Husu ita hotu nia komprensaun no kolaborasaun atu kumpre regra sira ne’ebé ita fó sai. Ita sei halo sosializasaun no fatin protokolu sira ne’e dalaruma ita sei tau avizu ruma iha ne’ebá”, salienta.
Nia afirma bainhira regra sira ne’e implementa, la presiza hein prezensa membru Polísia sira iha terrenu mak foin kumpre, maibé importante mak uza konxiénsia bainhira hakarak sai sidadaun ida ne’ebé kontribui ba dezenvolve nasaun nian, tanba sinál sira ne’ebé tau iha terrenu ne’e reprezenta ona prezensa Polísia nian.
Notísia relevante: DNTT-PNTL sei proíbe transporte para iha estrada ibun liu minutu lima
Jornalista: Arminda Fonseca
Editora: Maria Auxiliadora
