DILI, 27 Marsu 2025 (TATOLI) – Diresaun Nasionál Transporte Terrestre (DNTT) no Polísia Nasionál Timor-Leste (PNTL), liuhusi Seksaun Tránzitu sei implementa, iha tempu badak, regra hodi proíbe transporte sira para liu minutu lima iha estrada ibun husi liman loos no karuk hahú husi Rotunda Nicolau Loboto Komoro to’o ponte B.J Habibie.
Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, hateten DNTT simu ona orientasaun husi Ministru Transporte no Komunikasaun, Miguel Manetelu, no halo ona enkontru ho Polísia Tránzitu Nasionál no Munisípiu Dili hodi halo kooperasaun bandu ema para karreta no motór iha estrada ibun.
“Bainhira fó avizu tiha mak ema la kumpre no para liu minutu lima maka sei fó infrasaun ba sira, tanba kontraorden autoridade. Iha artigu 4, númeru 2 kódigu estrada [hateten] selu multa hahú husi $9 to’o $45”, Nelson Martins informa ba TATOLI.
Nia esplika katak DNTT no PNTL hasai regra ida-ne’e atu evita engarrafamentu, tanba dalabarak ema bá loja hola sasán no bá han iha restaurante sira maski fatin para karreta nian iha, maibé sira nafatin para iha estrada ibun hodi hamosu engarrafamentu.
“Semana oin ita hahú aviza ona pois implementa regra ne’e iha Abríl nia laran ho objetivu atu evita engarrafamentu iha kapitál liuliu dalan protokolu”, nia adianta.
Nia subliña katak daudaun regra ida-ne’e sei halo uluk ba estrada protokolu, haree komunidade kumpre ona mak kontinua ba dalan sira la’ós protokolu ne’e.
Notísia relevante: DNTT hahú estabelese ona parajen públiku balun iha Dili
Jornalista: Arminda Fonseca
Editora: Maria Auxiliadora
